اتىراۋدا بالاباقشا تاربيەشىسىنە قاتىستى تاعى دا شۋ شىقتى. الەۋمەتتىك جەلىدە تاراعان ۆيدەودا كىشكەنتاي قىز بالانىڭ شاشىنان سۇيرەگەنى انىق كورىنگەن ۆيدەو ەلدى الاڭداتقان ەدى. وسىعان وراي بالاباقشا تاربيەشىسىنە قاتىستى قىزمەتتىك تەكسەرىس باستالدى، دەپ حابارلادى Paryz.kz استانا ارناسىنا سىلتەمە جاساپ.
كوپتى الاڭداتقان وقيعا ناۋرىزدىڭ 29-ى كۇنى جىلىوي اۋدانى جاڭا قاراتون اۋىلىنداعى "بالدىرعان" بالاباقشاسىندا بولعان. تاربيەشىدەن كۇدىكتەنگەن اتا-انا بەينەباقىلاۋ كامەراسى جازىلعان تاسپانى قاراۋدى سۇراعان. جاسى نەبارى 21 جاستاعى تاربيەشىنىڭ بالاباقشاعا ورنالاسقانىنا ءبىر جىلدان اسىپتى.
"الەۋمەتتىك جەلىگە جاريالانعان ۆيدەونىڭ ءاربىر مينۋتىن، ءاربىر سەكۋنتىن قاراپ جاتىرمىز. قازىر ءبىز تاربيەشىنىڭ تاراپىنان دا، بالاباقشا مەڭگەرۋشىسىنىڭ ۋاقىتشا قىزمەتى لاۋازىمىنداعى ادامنان دا، ادىسكەرلەر، جالپى بارلىق قىزمەتكەرلەر تاراپىنان جەكە-جەكە تۇسىنىكتەمە الىپ جاتىرمىز", - دەدى اتىراۋ وبلىسى جىلىوي اۋداندىق ءبىلىم ءبولىمىنىڭ باستىعى گۇلجانسارا تاڭاتاروۆا.
سونداي-اق تاربيەشىگە قاتىستى سوتقا دەيىنگى تەرگەۋ جۇمىستارى جۇرگىزىلىپ جاتقاندىعى بەلگىلى بولدى.
"الەۋمەتتىك جەلىدەگى تاراعان بەينەجازباداعى وقيعاعا قاتىستى قىلمىستىق كودەكستىڭ 140 بابى، كامەلەتكە تولماعان ادامدى تاربيەلەۋ جونىندەگى مىندەتتەردى ورىنداماۋى بويىنشا سوتقا دەيىنگى تەرگەۋ جۇمىستارى جۇرگىزىلۋدە", - دەدى اتىراۋ وبلىسى پد ءباسپاسوز حاتشىسى گۇلزيرا مۇحتاروۆا.
