Atyraýda balabaqsha tárbıeshisine qatysty taǵy da shý shyqty. Áleýmettik jelide taraǵan vıdeoda kishkentaı qyz balanyń shashynan súıregeni anyq kóringen vıdeo eldi alańdatqan edi. Osyǵan oraı balabaqsha tárbıeshisine qatysty qyzmettik tekseris bastaldy, dep habarlady Paryz.kz Astana arnasyna silteme jasap.
Kópti alańdatqan oqıǵa naýryzdyń 29-y kúni Jylyoı aýdany Jańa Qaraton aýylyndaǵy "Baldyrǵan" balabaqshasynda bolǵan. Tárbıeshiden kúdiktengen ata-ana beınebaqylaý kamerasy jazylǵan taspany qaraýdy suraǵan. Jasy nebary 21 jastaǵy tárbıeshiniń balabaqshaǵa ornalasqanyna bir jyldan asypty.
"Áleýmettik jelige jarııalanǵan vıdeonyń árbir mınýtyn, árbir sekýntyn qarap jatyrmyz. Qazir biz tárbıeshiniń tarapynan da, balabaqsha meńgerýshisiniń ýaqytsha qyzmeti laýazymyndaǵy adamnan da, ádiskerler, jalpy barlyq qyzmetkerler tarapynan jeke-jeke túsinikteme alyp jatyrmyz", - dedi Atyraý oblysy Jylyoı aýdandyq bilim bóliminiń bastyǵy Gúljansara Tańatarova.
Sondaı-aq tárbıeshige qatysty sotqa deıingi tergeý jumystary júrgizilip jatqandyǵy belgili boldy.
"Áleýmettik jelidegi taraǵan beınejazbadaǵy oqıǵaǵa qatysty Qylmystyq Kodekstiń 140 baby, kámeletke tolmaǵan adamdy tárbıeleý jónindegi mindetterdi oryndamaýy boıynsha sotqa deıingi tergeý jumystary júrgizilýde", - dedi Atyraý oblysy PD baspasóz hatshysy Gúlzıra Muhtarova.
