Jerdiń sheteldikterge berilmeıtini jóninde naqty sheshim qabyldandy. Bul týraly QR Aýyl sharýashylyǵy mınıstrliginiń jer reformasy jónindegi komıssııa otyrysynda QR Premer-Mınıstriniń orynbasary Eraly Toǵjanov aıtty, dep jazdy QazAqparat.
«25 aqpanda Ulttyq qoǵamdyq senim keńesiniń besinshi otyrysynda QR Prezıdenti Qasym-Jomart Toqaevtyń aýyl sharýashylyǵy jerlerin sheteldikterge jáne sheteldik kompanııalarǵa, sheteldik úlesi bar qazaqstandyq kompanııalarǵa, azamattyǵy joq adamdarǵa, halyqaralyq qatysy bar ǵylymı ortalyqtarǵa, sondaı-aq qandastarǵa berýge tolyq tyıym salý týraly saıası sheshimi arnaıy zań jobasy retinde Parlamenttiń qaraýyna 12 naýryzda engizildi. Zań jobasynyń birinshi oqylymy Májiliste 7 sáýirde ótedi», - deıdi QR Premer-Mınıstriniń orynbasary Eraly Toǵjanov.
Onyń aıtýynsha, kópshilik arasynda, ásirese áleýmettik jelilerde áli de jekelegen túsinispeýshilikter taralyp júr. «Jalǵan qaýesetti ádeıi taratýshylar da joq emes ekenin aıtýymyz kerek. Sondyqtan taǵy bir naqtylap aıtamyn: jerdiń sheteldikterge berilmeıtini jóninde naqty sheshim qabyldandy.
Memleket basshysy Qasym-Jomart Kemeluly qoǵam tarapynan kóterilip otyrǵan negizgi máseleler boıynsha túıindi sheshimin aıtyp, núktesin qoıdy. Qazirgi tańda komıssııa aldynda aýyl sharýashylyǵy salasyndaǵy jer qatynastaryn damytý máselesi boıynsha usynymdar ázirleý mindeti tur. Endi osy máselelerdi jan-jaqty aqyldasqanymyz durys», - dedi ol.
"Adyrna" ulttyq portaly
©QazAqparat
