جانۋار تەرىسىن ساقتاعاندارعا قىلمىستىق ءىس قوزعالادى

1096

قازاقتىڭ سپورت جانە تۋريزم اكادەمياسىنىڭ پرەزيدەنتى قايرات زاكىريانوۆ جويىلىپ كەتۋدىڭ الدىندا تۇرعان اڭداردىڭ تەرىسىن كابينەتىندەگى جيھازعا جايىپ تاستاعان سۋرەتتەن كەيىن قىلمىستىق جازاعا تارتىلۋى مۇمكىن. بۇل تۋرالى كتك ارناسى حابارلادى.

رەكتوردىڭ كوللەكتسياسىنا قاتىستى ءتورت ايلىق تەكسەرىستەن كەيىن پوليتسيا قىلمىستىق ءىس قوزعادى.

"اتالمىش قىلمىستىق ءىس قازىر المالى اۋداندىق پوليتسيا باسقارماسىندا تەرگەلۋدە. ءتيىستى تەرگەۋ امالدارى مەن ساراپتامالار جۇرگىزىلۋدە. قىلمىستىق ءىس جۇرگىزۋ كودەكسىنىڭ 201-بابىنا سايكەس، تەرگەۋ رەتى جانە باسقا دا ءمان-جايلار جاريا ەتىلمەيدى", – دەدى الماتى قالاسى پوليتسيا دەپارتامەنتىنىڭ رەسمي وكىلى سالتانات ازىربەك.

بىلدەي سپورت جانە تۋريزم اكادەمياسىنىڭ پرەزيدەنتىنە قاتىستى جانجال قاڭتاردا شىققان. بەلگىلى سپورتشى جانقوش تۇراروۆ قايرات زاكىريانوۆپەن بىرگە تۇسكەن سۋرەتىن الەۋمەتتىك جەلىگە جۇكتەپ، بايقاماي باسشىنىڭ باعالى كوللەكتسياسىن بۇكىل ەلگە جاريا قىلعان.

ال باسشىنىڭ تەرىلەردى سوناۋ افريكادان اتىپ اكەلگەنى بەلگىلى بولدى. زەبرا، كەنگۋرۋ، ايۋ، انتيلوپا، ءتىپتى كەرىكتىڭ تەرىسىن اياق استىنا كىلەم ەتىپ توسەيدى ەكەن.

تەرگەۋشىلەردىڭ سۇراعى قار بارىسى مەن تۇركىستاندىق سىلەۋسىننىڭ تەرىلەرى جانە قابىرعاداعى اققۋلارعا قاتىستى بولعان. سۋرەتتە كورىنىپ تۇرعانداي، اكادەميا پرەزيدەنتى قىزىل كىتاپقا ەنگەن جانۋارلاردىڭ ءبىرىن جيھاز، ەندى ءبىرىن توسەنىش رەتىندە قولدانعان.

باسى داۋعا قالعان باسشى باستاپقىدا تەرىلەردى "تانىستارىم سىيلادى" دەپ، جاۋاپتان جالتارعان. ءتىپتى، "جاساندى" دەپ مالىمدەگەن.

الايدا، پوليتسيانىڭ قىلمىستىق ءىس قوزعاۋىنا قاراعاندا تەرىلەر جاساندى ەمەس. ال وقۋ ورنىنىڭ باسشىسى تەرىلەرگە قاتىستى قاندايدا ءبىر سۇحبات بەرۋدەن باس تارتتى.

"بۇل جاعداي بويىنشا تۇسىنىكتەمە بەرۋدەن باس تارتامىز. بۇعان دەيىن ايتقانىمىزداي، قار بارىسىنىڭ تەرىسى اكادەميا باسشىسىنا سىيعا تارىلعان. قازاق تۋريزم جانە سپورت اكادەمياسىنىڭ پرەزيدەنتى ءوزى قالاعان كەزدە ماسەلەنىڭ ءمان-جايىن ءتۇسىندىرىپ سۇحبات بەرەدى", – اكادەميا پرەزيدەنتىنىڭ ءباسپاسوز حاتشىسى ءاليا بەيسەباەۆا.

پىكىرلەر
رەداكتسيا تاڭداۋى