الاكول اۋدانىندا «جۇمىسپەن قامتۋدىڭ جول كارتاسى» باعدارلاماسى اياسىندا «جالىن» قالا سىرتىنداعى لاگەرى اشىلادى.
مەكتەپتە توعىز ايعا سوزىلعان وقۋدان بوسايتىن بالالاردىڭ جازعى دەمالىسىن اتا-اناسى جوسپارلاپ قويادى. ءبىرى اۋىلعا اتا-اجەسىنە بارسا، ءبىرى ساۋىقتىرۋ لاگەرلەرىنە بارۋدى ءجون سانايدى. تابيعاتى اسەم دە كوركەم جەردە ورنالاسقان لاگەر كەز-كەلگەن بالاعا ۇلكەن اسەر قالدىراتىنى ءسوزسىز. 
ايدىندى الاكول جاعالاۋىندا بالالارعا ارنالعان ساۋىقتىرۋ ورىنىنىڭ جۇمىسى قولعا الىنىپ، جەتىسۋلىق بۇلدىرشىندەرىنىڭ دەمالىسىن پايدالى ءارى قىزىقتى وتكىزۋ ماقساتىندا وڭىردە جاڭا بالالار كەشەنى بوي كوتەرمەك. اتالمىش لاگەر جۇمىسىنا جاۋاپتى الماتى وبلىسى قۇرىلىس باسقارماسى. «جالىن» قالا سىرتىنداعى بالالار دەمالىس ورنىنىڭ جوباسىنا سايكەس لاگەر اۋماعىندا 20 ورىندىق بەس جاتىن كورپۋس، ءبىر شىعارماشىلىق ءۇي، ءبىر اسحانا، پەرسونالعا ارنالعان جاتاقحانا، ءبىر مەدپۋنكت، بالالار الاڭى، بالالار قالاشىعى، سپورت الاڭدارى، قوناق ءۇي قاراستىرىلعان. جازعى دەمالىس كەزىندە ءبىر ماۋسىمدا 100 – دەن استام بالانى قابىلداۋ كوزدەلىپ وتىر. ول دەگەنىمىز ءبىر ماۋسىم ون كۇن ارالىعىن قامتىسا، التى ماۋسىمدا 600 دەي بالاعا دەمالۋعا مۇمكىندىك جاسالادى. دەمالىس ورنىنا كەلەتىن بالالار توبى جاس ەرەكشەلىكتەرىنە بايلانىستى جيناقتالادى. قۇرىلىسى كەزىندە 100-گە جۋىق ادام جۇمىسپەن قامتىلسا، ونىڭ ىشىندە شتاتتىق رەجيمدە 47 تۇراقتى جۇمىس ورنىڭ اشۋ قاراستىرىلۋدا. مامانداردىڭ ايتۋىنشا اقشي اۋىلى ماڭىندا بوي كوتەرەتىن «جالىن» قالا سىرتىنداعى لاگەرىنىڭ عيماراتتارى مەن قۇرىلىستارى قازىرگى زامانعى تالاپتارعا ساي جاساقتالادى. بۇل ءوز كەزەگىندە بالالاردىڭ ەمىن-ەركىن دەمالۋىنا قولايلى جاعداي جاساۋ مەن سالاۋاتتى ءومىر سالتىن ۇستانۋىنا ىقپال ەتپەك.
