الماتى پوليتسەيلەرى جاس ايەلگە پىشاقپەن قاۋىپ ءتوندىرىپ، قاراقشىلىق شابۋىل جاساعان كۇدىكتىنى قۇرىقتادى، دەپ حابارلايدى «ادىرنا» ءتىلشىسى Polisia.kz-كە سىلتەمە جاساپ.
الماتى قالاسى بوستاندىق اۋدانى رادوستوۆەتس كوشەسىندەگى ۇيلەردىڭ ءبىرىنىڭ تۇرعىنىنان “102” پۋلتىنە 00.50-دە شۇعىل قوڭىراۋ كەلىپ ءتۇستى. شوشىنعان ايەل كورشىلەس پاتەردەن كومەك سۇراپ ايقايلاعان داۋىستى ەستىگەنىن ايتتى.
– ءبىز كورسەتىلگەن پاتەرگە ساناۋلى مينۋتتاردا جەتتىك. ەسىكتى اشپاستان، پاتەر يەسى ءبارى دۇرىس ەكەندىگىن جانە ءبىزدىڭ كومەگىمىزگە مۇقتاج ەمەس ەكەنىن ايتتى. شىنىمدى ايتسام، ايەلدىڭ داۋىسى ۇرەيلى بولدى، سوندىقتان ءبىز ماسەلەنىڭ انىق-قانىعىنا كوز جەتكىزبەي، وقيعا ورنىنان كەتپەۋ تۋرالى شەشىم قابىلدادىق. ءبىز ەسىكتى اشۋدى سۇرادىق، بىراق جاۋاپ بولمادى. سودان كەيىن تىڭداپ تۇرىپ، پاتەر ىشىندە شۋدىڭ، قانداي-دا ءبىر كيكىلجىڭنىڭ بار ەكەنىن بايقادىق. مەنىڭ ارىپتەسىم كىلت ساڭىلاۋى ارقىلى بەتىنە قارا بەتپەردە كيگەن ادامدى كوردى، ونىڭ قولىندا پىشاق بولدى، ەر ادام پىشاقتى ايەلدىڭ تاماعىنا تاقاپ تۇردى. دۇرىس شەشىم قابىلداۋ جانە كۇدىكتى قۇربانىنا زاقىم كەلتىرىپ ۇلگەرمەۋى ءۇشىن ونى شوشىتىپ الماۋ ماڭىزدى بولدى. ءبىر ساتتە ءبىز پاتەرگە كىرىپ ۇلگەردىك، قارۋلى ادام دەرەۋ زالالسىزداندىرىلىپ، ۇستالدى. تەكسەرۋ بارىسىندا كۇدىكتىنىڭ بۇرىن ءتورت رەت سوتتالعان 40 جاستاعى ازامات ەكەنى انىقتالدى – دەدى الماتى قالالىق پد جپقب پاترۋلدىك پوليتسيا پولكىنىڭ ينسپەكتورى نۇردوس تۇرلىبەك.
قالالىق كريمينالدىق پوليتسيانىڭ مالىمەتىنشە، كۇدىكتى كوشەدە قىزدىڭ سوڭىنان ءتۇسىپ، ونىڭ پاتەرىنە باسا-كوكتەپ كىرگەن. ۇيدە ەشكىم جوق بولعان.
– ەر ادام پىشاقپەن قورقىتىپ، جابىرلەنۋشىگە قاراقشىلىق شابۋىل جاساعان، ول جابىرلەنۋشىدەن قۇندى زاتتارى مەن جيناق اقشاسىن بەرۋدى تالاپ ەتكەن. الايدا پاترۋلدىك پوليتسەيلەر مەن كورشىنىڭ پوليتسياعا دەر كەزىندە حابار بەرۋى قاسكويدىڭ قىلمىستىق جوسپارلارىن بۇزدى. ول قاماۋعا الىندى. قىلمىستىق ءىس بوستاندىق اۋداندىق پوليتسيا باسقارماسىندا تەرگەلۋدە. وقيعا ورنىنان زاتتاي ايعاقتار الىنىپ، ءىس ماتەريالدارىنا تىركەلدى، – دەدى الماتى قالالىق پد كريمينالدىق پوليتسيا باسقارماسىنىڭ باستىعى ەركىن ىڭكاروۆ.
«ادىرنا» ۇلتتىق پورتالى
