بۇل تۋرالى ايماق باسشىسى ماحامبەت دوسمۇحامبەتوۆتىڭ توراعالىعىمەن وتكەن وڭىرگە ينۆەستيتسيا تارتۋ مەن ينۆەستيتسيالىق جوبالاردى جۇزەگە اسىرۋعا قاتىستى جيىندا كاسىپكەرلىك جانە يندۋستريالىق-يننوۆاتسيالىق دامۋ باسقارماسى باسشىسىنىڭ مىندەتىن اتقارۋشى قانىش مامبەتوۆ مالىمدەدى.
«بيىلعى جىلى جالپى قۇنى شامامەن 920,4 ملرد. تەڭگەنى قۇرايتىن 11 ينۆەستيتسيالىق جوبانى ىسكە قوسۋ جوسپارلانىپ وتىر. اتالعان جوبالار جۇزەگە اسقاندا 762 جۇمىس ورنىن اشۋعا مۇمكىندىك بەرەدى»،- دەدى كاسىپكەرلىك جانە يندۋستريالىق-يننوۆاتسيالىق دامۋ باسقارماسى باسشىسىنىڭ مىندەتىن اتقارۋشى قانىش مامبەتوۆ.
جوبالاردىڭ شەڭبەرىندە «تۇيىرشىكتى كۇكىرت ءوندىرۋ زاۋىتى»، «تاماق قالدىقتارىنان ورگانيكالىق تىڭايتقىشتار ءوندىرىسى»، «بەتون جانە تەمىر بەتون بۇيىمدارىن شىعاراتىن زاۋىت»، «گازحيميالىق كەشەن قۇرىلىسى»، «قۇرعاق قۇرىلىس قوسپالارى ءوندىرىسى»، «توقىما گەوتەكستيل شىعاراتىن تسەح»، «مۇنايگاز سالاسى ءۇشىن ماشينا جاساۋ زاۋىتى» ىسكە قوسىلماق.
جيىن سوڭىندا ءوڭىر باسشىسى جاۋاپتى تۇلعالارعا ناقتى تاپسىرمالار جۇكتەدى. «ينۆەستيتسيا تارتۋ بويىنشا ناقتى ۇسىنىستار بەرىپ، ولارعا بارىنشا قولداۋ كورسەتۋ كەرەك. نىسانداردىڭ ينفراقۇرىلىمدارىن جوسپارلانعان مەرزىمىندە اياقتاپ، جۇمىستى كۇشەيتۋدى تاپسىرامىن»،- دەدى ماحامبەت دوسمۇحامبەتوۆ.
