تارازدا مەرزىمدى قىزمەتتەگى سارباز اسكەري بولىمنەن قاشىپ كەتتى. تۇنگى كەزەكشىلىك كەزىندە جوعالىپ كەتكەن 19 جاستاعى جىگىتتى 4 كۇننەن بەرى ىزدەپ جاتىر، دەپ حابارلايدى حابار 24 سايتى.
اسكەريلەردىڭ ايتۋىنشا، نۇراسىل ارىسباەۆ تۇنگى ساعات ءۇش شاماسىندا اسكەري بولىمنەن ەشكىمگە ەسكەرتپەستەن ءوز ەركىمەن كەتىپ قالعان. جانىنداعى سەرىگى دە بايقاماعان. سارباز ءالى 6 اي اسكەري بورىشىن وتەۋى كەرەك. نۇراسىلدىڭ كەتىپ قالعانىنا اسكەريلەر تاڭعالىپ وتىر. سەبەبى، ول باسقالارمەن قارىم-قاتىناسى جاقسى، سابىرلى جىگىت. جاۋاپتىلار ونىڭ قولىندا قارۋ جوق ەكەنىن مالىمدەدى. ال، ساربازدىڭ تۋىستارى ونىڭ قاشىپ كەتكەنىنە سەنبەيدى.
«سوڭعى رەت 20-سىندا زۆوندادى، «ءبارى جاقسى ماما، ۋايىمداماڭىز»-دەدى. ەشكىم رەنجىتىپ جاتقان جوق پا، دەپ سۇرادىم. «جوق، ءبارى جاقسى، ۋايىمداماڭىز، بالالار دا جاقسى، كومانديرلەر دە جاقسى»، دەدى»،-دەيدى ساربازدىڭ اناسى گۇلجان ارىسباەۆا.
«نە سەبەپتەن قاشىپ كەتكەنى بىزگە بەيمالىم. بۇگىنگى تاڭدا جامبىل وبلىسى بويىنشا جانە تاراز قالاسىندا وسى اسكەري ءبولىمنىڭ قىزمەتكەرلەرى جانە قۇقىق قورعاۋ ورگاندارى تاراپىنان تاراز قالاسى پوليتسيا باسقارماسىنىڭ قىزمەتكەرلەرى ىزدەستىرۋ شارالارىن جۇرگىزىپجاتىر. ازىرگە ناتيجە جوق»،-دەيدى 8595 اسكەري ءبولىمى كومانديرىنىڭ تاربيە جانە يدەولوگيالىق جۇمىستار جونىندەگى ورىنباسارى باۋىرجان دۇيسەنباەۆ.
