يمانبەك، اكىم بەرگەن سىيلىقتان باس تارتتى

2952
Adyrna.kz Telegram

«گرەممي» پرەمياسىنىڭ يەگەرى يمانبەك زەيكەنوۆ تۋعان جەرى اقسۋ قالاسىندا جاستارمەن كەزدەسىپ، قالا اكىمىنىڭ اقشالاي سىيلىعىنا يە بولدى. الايدا، يمانبەك ءوز سىيلىعىنان باس تارتىپ، ونى قايىرىمدىلىق قورىنا بەردى، دەپ حابارلايدى «ادىرنا» ۇلتتىق پورتالى، Tengrinews.kz-كە سىلتەمە جاساپ.

كەزدەسۋدە يمانبەك ءوزى تۋرالى جانە ماسكەۋدەگى ساپاردان العان اسەرى مەن  بولاشاق جوسپارلارى جايلى ءسوز ەتتى. دي-دجەيگە وبلىس اكىمىنىڭ جانە مادەنيەت ءمينيسترىنىڭ قۇتتىقتاۋلارى كەلىپ ءتۇستى. سونىمەن قاتار ونى «قازاقكونتسەرت» ديرەكتورى جەڭىس سەيدوللاۇلى دا قارسى الدى. ⠀

وعان وبلىس اكىمى زاماناۋي قۇرال-جابدىقتار ساتىپ الۋ ءۇشىن 2 ميلليون تەڭگەنى «پرەمياعا كورىمدىك» رەتىندە سىيعا تارتتى. ال اقسۋ قالاسىنىڭ اكىمى نۇرجان اشىمبەتوۆ شاپان جاۋىپ، سىي-قۇرمەتكە بولەدى.

«مەندە جۇمىسىما قاجەتتى زاماناۋي قۇرال-جابدىقتار بار. سوندىقتان مەن بۇل اقشانى قايىرىمدىلىققا جۇمساماقپىن. مەن ەشقايدا كەتكىم كەلمەيدى. مەن كۇن سايىن قالالاردى ارالاۋدامىن. بولاشاق جوسپارىم، مەن مۋزىكامەن جۇمىسىمدى جالعاستىرامىن. تەمىرجولدى تاستاعانىما ءبىر جىلدان استى. قازىرگى جاستار ءبارىن جەمقور دەپ ويلايدى، ونى جويۋ مۇمكىن ەمەس دەيدى. بۇنىڭ ءبارى – جالعان. ءبارى ءوز قولىڭدا. ال مەن كەلەسى رەليزىمدى شون پولمەن قۇرۋدى جوسپارلاپ وتىرمىن»، - دەدى يمانبەك. ⠀

ول سونىمەن قاتار ءانشى ەلدجەيمەن كەلىسىمشارت تۋرالى قاۋەسەتتەردى جوققا شىعاردى. ونىڭ ايتۋىنشا، ول ونىمەن بىرگە تەك ءان جازعان.

"ادىرنا" ۇلتتىق پورتالى

پىكىرلەر