"ۋكراينا داۋىسى" بايقاۋىنىڭ 11-ماۋسىمىندا ەل اتىنان ديليارا ديدارقىزى قاتىسۋدا. ول داۋىسىمەن تالايدىڭ تاڭدايىن قاققىزىپ، بايقاۋدىڭ ءۇشىنشى كەزەڭىنە ءوتتى دەپ حابارلايدى "ادىرنا" ءتىلشىسى.
14-ناۋرىز كۇنى "ۋكراينا داۋىسى" بايقاۋىنىڭ ەكىنشى كەزەڭىندە قاتىسۋشىلار تاعى باقتارىن سىنادى. بۇل كەزەڭدە قوس ءانشى ءبىر ءاندى بىرگە ورىندايدى. جەتەكشىلەرىنىڭ كوڭىلىنەن شىققان ورىنداۋشى كەلەسى كەزەڭگە جولداما الادى.
ديليارا "ۋكراينا داۋىسىنىڭ" كورمەي تىڭداۋ كەزەڭىندە "My all" ءانىن ورىنداپ، بايقاۋداعى سوڭعى ورىن ولەگ ۆيننيكتىڭ توبىنا قوسىلعان ەدى.
"مەن بۇل ورىندى اقتايمىن، سىزگە ۇلكەن راقمەت" دەپ كوز جاسىنا ەرىك بەرگەن ارۋعا ءوز بەت ورامالىن ۇسىنعان ولەگ:
"سەن قازىر بۇل ورامالمەن باقىتتان جىلاعان كوز جاسىڭدى سۇرتسەڭ، فينالدا ەكەۋمىزدىڭ قۋانعان جاسىمىزدى بىرگە سۇرتەيىك" دەدى.
ەكىنشى، "جەكپە-جەك" كەزەڭىندە يارينا ماليشنياكپەن بىرگە "When you believe" ءانىن ورىنداپ ولەگتىڭ تاعى دا كوڭىلىنەن شىققان ديليارا، كەلەسى كەزەڭگە اياق باستى.
ء"بىزدىڭ جەكپە-جەككە تاڭداعان ءانىمىز «When you believe» اتتى ورىنداۋعا وتە قيىن ءان بولدى. يارينا ەكەۋمىزگە بۇل ءاندى ورىنداۋ وتە قيىنعا سوقتى. ويتكەنى ەكەۋمىز ەكى ەلدە بولدىق. تاپسىرمادا بىرگە ءان ايتۋ كەرەك. قاتىسۋشىلاردىڭ ىشىنەن تەك ءبىز عانا توقتاۋسىز جاتتىققان شىعارمىز. ءبىزدىڭ ورىنداۋ اياقتالعاننان كەيىن، تەك بىرەۋىمىز عانا وتكەنىمىز وكىنىشتى. ەكەۋمىز دە لايىق ەدىك. بىراق بۇل شوۋ. مۇندا ءبارى ەرتە مە، كەش پە ۇشىپ كەتەدى. بۇنى ۋاقىت كورسەتەدى. بىراق مەن سوڭىنا دەيىن كۇرەسەمىن" دەدى ديليارا ءوزىنىڭ Instagram پاراقشاسىندا.
"ادىرنا" ۇلتتىق پورتالى
