"Ýkraına daýysy" baıqaýynyń 11-maýsymynda el atynan Dılıara Dıdarqyzy qatysýda. Ol daýysymen talaıdyń tańdaıyn qaqqyzyp, baıqaýdyń úshinshi kezeńine ótti dep habarlaıdy "Adyrna" tilshisi.
14-naýryz kúni "Ýkraına daýysy" baıqaýynyń ekinshi kezeńinde qatysýshylar taǵy baqtaryn synady. Bul kezeńde qos ánshi bir ándi birge oryndaıdy. Jetekshileriniń kóńilinen shyqqan oryndaýshy kelesi kezeńge joldama alady.
Dılıara "Ýkraına daýysynyń" kórmeı tyńdaý kezeńinde "My all" ánin oryndap, baıqaýdaǵy sońǵy oryn Oleg Vınnıktiń tobyna qosylǵan edi.
"Men bul oryndy aqtaımyn, sizge úlken raqmet" dep kóz jasyna erik bergen arýǵa óz bet oramalyn usynǵan Oleg:
"Sen qazir bul oramalmen baqyttan jylaǵan kóz jasyńdy súrtseń, fınalda ekeýmizdiń qýanǵan jasymyzdy birge súrteıik" dedi.
Ekinshi, "jekpe-jek" kezeńinde Iarına Malıshnıakpen birge "When you believe" ánin oryndap Olegtiń taǵy da kóńilinen shyqqan Dılıara, kelesi kezeńge aıaq basty.
"Bizdiń jekpe-jekke tańdaǵan ánimiz «When you believe» atty oryndaýǵa óte qıyn án boldy. Iarına ekeýmizge bul ándi oryndaý óte qıynǵa soqty. Óıtkeni ekeýmiz eki elde boldyq. Tapsyrmada birge án aıtý kerek. Qatysýshylardyń ishinen tek biz ǵana toqtaýsyz jattyqqan shyǵarmyz. Bizdiń oryndaý aıaqtalǵannan keıin, tek bireýimiz ǵana ótkenimiz ókinishti. Ekeýmiz de laıyq edik. Biraq bul shoý. Munda bári erte me, kesh pe ushyp ketedi. Buny ýaqyt kórsetedi. Biraq men sońyna deıin kúresemin" dedi Dılıara óziniń Instagram paraqshasynda.
"Adyrna" ulttyq portaly
