تۇركىستان وبلىسى قازىعۇرت اۋدانىندا ومىردەن وتكەن اكەسىنىڭ زەينەتاقىسىن زاڭسىز الىپ وتىرعان تۇرعىن انىقتالدى، دەپ حابارلايدى «ادىرنا» ءتىلشىسى Polisia.kz-كە سىلتەمە جاساپ.
«قازىعۇرت اۋداندىق پوليتسيا باسقارماسىنا اۋدان پروكۋراتۋراسىنان قۇجاتتار كەلىپ ءتۇستى. وندا جەرگىلىكتى تۇرعىنداردىڭ ءبىرى قايتىس بولعان اكەسىنە مەملەكەت تاراپىنان تولەنەتىن زەينەتاقىسىن زاڭسىز الىپ كەلگەنى كورسەتىلگەن. وسىلايشا تۇرعىن زەينەتاقىنى الۋ مۇمكىنشىلىگى جوق ەكەنىن بىلە تۇرا، ەكى جىل ءۇش اي زاڭسىز الىپ، مەملەكەتكە ءبىر ميلليون 200 مىڭنان استام تەڭگە شىعىن كەلتىرگەن»،-دەلىنگەن حابارلامادا.
اتالعان جايت قر قك-ءنىڭ 190-بابى (الاياقتىق) بويىنشا تىركەۋگە الىندى. اقپارات الىسىمەن پوليتسەيلەر بىردەن ارەكەت ەتىپ، كۇدىكتى تۇرعىننىڭ جەكە باسىن انىقتادى. ونى تۇرعىلىقتى مەكەنجايىنان ۇستاپ، اپب-نە جەتكىزكەن.
ايتا كەتەيىك، ەر ادام ءوز كىناسىن تولىق مويىندادى. باس شاراسى “مىندەتتەمەدە”. بۇگىندە تۇرعىن مەملەكەت تاراپىنان ەكى جىل الدىن دۇنيەدەن وتكەن اكەسىنىڭ اتىنان الىپ وتىرعان اقشالاردى قايتارعان.
«ادىرنا» ۇلتتىق پورتالى
