سيريا كارتادا بولعانى بولماسا، شىنايى ومىردە جوق

1. سوعىستا رەسمي ستاتيستيكا بويىنشا 387 مىڭ ادام قازا تاپقان. بۇل سىرتتان كەلگەن سودىرلاردى ەسەپتەمەگەندە. ال بەيرەسمي دەرەكتەر بويىنشا وققا ۇشقاندار سانى 700 مىڭنان باستالىپ، 1 ملن اراسىندا.

2. سوعىس سالدارىنان 5,6 ملن ادام سىرت ەلدەرگە بوسىپ كەتتى. بوسقىنداردىڭ باسىم بولىگى تۇركيا، ليۆان مەن يوردانياعا اعىلعان. ءبىرازى ەۋروپا ەلدەرىنە باردى. ال ساۋد ارابياسى مەن ءباا بوسقىن قابىلداۋدان باس تارتتى.

3. ەلدىڭ ىشىندەگى بوسقىندار سانى 6,7 ملن ادامدى قۇرايدى. ولار ۇرىس ايماقتارىنان ەلدىڭ قاۋىپسىزدەۋ ولكەلەرىنە ۇنەمى قونىس اۋدارىمەن كەلەدى.

4. گۋمانيتارلىق كومەككە 13 ملنعا جۋىق ادام ءزارۋ. بۇۇ-نىڭ مالىمەتىنە سەنسەك، سيريادا كۇنىنە 12 ملن ادام تاماق ىزدەۋمەن جۇرسە، بالالاردىڭ 60% اشىققاندار قاتارىندا. 2 ملن حالىق كەدەيلىكتىڭ ەڭ سوڭعى شەگىندە ءومىر ءسۇرىپ جاتىر.

5. جاراقات العاندار سانى رەسمي دەرەك بويىنشا 2.2 ملن ادام، ال ءىز-ءتۇسسىز جوعالعاندار سانى 200 مىڭنان اسادى.

6. قازىرگى تاڭدا اساد ەلدىڭ 60% ءوز باقىلاۋىندا ۇستاپ وتىر، وندا شامامەن 11-12 ملن حالىق تۇرادى. ال وپپوزيتسيالىق كۇشتەردىڭ يەلىگىندە تۇراتىن حالىق سانى 2 ملن. ءتۇرلى تەررورلىق توپتاردىڭ ايماعىندا تۇرىپ جاتقان تۇرعىندار سانى 1.5-2 ملن ادامدى قۇرايدى. بايقاعاندارىڭىزداي ەل بولشەكتەنىپ كەتكەن.

7. World Vision ۇيىمىنىڭ ەسەپتەۋىنشە سيريا سوعىسى ەل ەكونوميكاسىنا 1,2 ترلن دوللار شىعىن اكەلگەن. دەمەك ءار جىل سايىن 120 ملرد دوللار شىعىن بولعان. سۇمدىق كورسەتكىش قوي.

8. Cيريادا 70% ەلەكتر توقتارى ىستەن شىققان. سوعىستىڭ سالدارىنان ءتۇرلى مامان يەلەرى ەلدەن كەتىپ قالعان، ولاردىڭ ىشىندە 75% دارىگەرلەر. ەلدەگى اۋرۋحانالاردىڭ 58% عانا جۇمىس ىستەيدى. 2.4 ملن بالا مەكتەپكە بارمايدى، ال مەكتەپتەردىڭ 67% قيراعان، اسكەري جانە تەررورلىق توپتاردىڭ بازالارىنا اينالدىرىلعان.

 ەگەر جاعدايعا رەالي قاراساق، سيريا دەگەن مەملەكەت تەك كارتادا عانا بار. ال شىنايى ومىردە جوقتىڭ قاسى. مەملەكەت ىقپال ەتۋ ايماقتارىنا ءبولىنىپ كەتتى. رەسەي، تۇركيا، اقش، يران ءوز اۋماقتارىن الدى. يزرايل كۇندە سيريا اۋماعىن بومبالاۋمەن كەلەدى. ەندى بۇرىنعى سيريا قالپىنا كەلۋ ءۇشىن كەمى 100 جىل ۋاقىت كەرەك شىعار. ەلدى كوتەرەتىن بىلىكتى ماماندار نە ءولدى، نە ەلدەن كەتىپ قالدى. ولار قايتىپ ورالمايدى، دەمەك سيريانىڭ دا قايتا تۇلەۋى ەكىتالاي.