قازاقستاندىق مەكتەپ وقۋشىلارىنىڭ كوكتەمگى دەمالىسى 12 كۇنگە سوزىلادى. بۇل تۋرالى قر ءبىلىم جانە عىلىم مينيسترلىگىنىڭ ءباسپاسوز قىزمەتى حابارلادى.
«مەكتەپ وقۋشىلارىنىڭ كوكتەمگى دەمالىسى 20-31 ناۋرىز ارالىعىندا – 12 كۇن بولادى. 4-توقساننىڭ ساباعى 1 ساۋىردە باستالادى»، – دەلىنگەن مينيسترلىك حابارلاماسىندا.
سوناي-اق ۆەدومستۆو 3-توقساندا 1-سىنىپ وقۋشىلارى ءۇشىن قوسىمشا دەمالىس بولعانىن مالىمدەدى. ول 7 كۇن، ياعني 8-14 اقپان ارالىعىندا بولعان.
ەسكە سالساق، وقۋ جىلىنىڭ 3-توقسانىنان باستاپ ءبىتىرۋشى سىنىپتار (9,11,12 سىنىپتار) سانيتارلىق-ەپيدەميولوگيالىق تالاپتار ساقتالا وتىرىپ، ارالاس وقىتۋ (پاندەردىڭ 70 پايىزىن – ءداستۇرلى فورماتتا، 30 پايىزىن – قاشىقتان) فورماتىنا كوشىرىلدى.
سونىمەن قاتار، قر باس مەملەكەتتىك سانيتاريالىق دارىگەرىنىڭ جاڭا قاۋلىسىنا سايكەس، 1 ناۋرىزدان باستاپ مەكتەپتەردە ءبىلىم بەرۋ ارالاس فورماتقا كوشىرىلگەندىكتەن، 1-5 سىنىپ وقۋشىلارى مەكتەپتە وقي باستادى.
