ەلەكتر قۋاتى ءتاريفىنىڭ كوتەرىلۋىنە نە سەبەپ بولعانى جونىندە ەنەرگەتيكا جونىندەگى ساراپشى، ەكونوميكا عىلىمدارىنىڭ كانديداتى الىشەر قۇرباناليەۆ پىكىر ءبىلدىردى، دەپ حابارلايدى «ادىرنا» قازاقپاراتقا سىلتەمە جاساپ.
ايتا كەتەيىك، ەنەرگەتيكا مينيسترلىگى ەلەكتر ەنەرگياسىنا ارنالعان تاريفتەردى كوتەرۋ تۋرالى بۇيرىعىنىڭ جوباسىن جاريالادى. قۇجات ناۋرىزدىڭ 26-سىنا دەيىن تالقىلاۋعا شىعارىپ وتىر. وسىعان وراي ەنەرگەتيكا جونىندەگى ساراپشى اتالعان بۇيرىققا قاتىستى تۇسىندىرمە بەردى.
«ەلەكتر ەنەرگياسى – بۇل ەلەكتر وندىرەتىن ستانسالار ساتاتىن جالعىز تاۋار. كەز كەلگەن ءوندىرۋشى ءونىمىن ساتىپ، تۇسكەن كىرىس ەسەبىنەن ءوزىنىڭ بارلىق شىعىندارىن جابۋعا تىرىسادى. وعان وندىرىستىك شىعىندار، ونىڭ ىشىنە جۇمىسشىلاردىڭ جالاقىسى، شىعىندالاتىن ماتەريالدار، وتىن كىرەدى. بۇل ستانسا جۇمىسىنىڭ ودان ارى جالعاسۋىنىڭ نەگىزى سانالادى»، - دەدى ساراپشى.
ونىڭ اتاپ وتۋىنشە، كەز كەلگەن جابدىقتى جاڭارتۋ، جوندەۋ جانە اۋىستىرىپ وتىرۋ قاجەت. ويتكەنى ەلىمىزدىڭ ەلەكتر ەنەرگەتيكا نىساندارى كەڭەس وداعى زامانىنان قالعان ءارى ەسكىرگەن.
«كەز كەلگەن جابدىقتى جاڭارتىپ، جوندەپ، اۋىستىرىپ وتىرۋ كەرەك. قاجەتتى دەڭگەيگە دەيىن ءتاريفتىڭ كوتەرىلمەۋى سالدارىنان ستانسالار قاجەتتى جوندەۋ جۇمىستارىن جۇرگىزە الماي وتىر. ەنەرگەتيكتەر ۇيىمىزدە شام ءسونىپ قالماۋى ءۇشىن ەلەكتر ەنەرگياسىمەن سەنىمدى ءارى ساپالى قامتاماسىز ەتۋگە مىندەتتى. بىراق، ولار قىزمەتكەرلەرىنە جالاقى تولەۋ، اگەنتتەرگە كەلىسىمشارت بويىنشا تولەم جاساۋ ءۇشىن قاراجاتىن ۇنەمدەۋگە، باسقا دا جولدارىن ۇنەمى ىزدەۋگە ءماجبۇر. ولار جوندەۋ جۇمىستارىن جۇرگىزىپ ۇلگەرمەي جاتىر. سوندىقتان ءتاريفتى كوتەرۋ ستانسالارعا اتالعان ءىس-شارالاردى اتقارۋ ءۇشىن قاجەت»، - دەدى ول.
سونىمەن قاتار ول ەلەكتر ەنەرگياسىنا تاريف كوتەرىلگەننەن كەيىن وسى ايدىڭ ىشىندە، نەمەسە وسى جىلدا ەلىمىزدىڭ بارلىق ەلەكتر ەنەرگەتيكاسى جاڭارتىلادى دەۋگە كەلمەيدى.
«ءتىپتى، قاراپايىم تۋربينانىڭ ءوزىن اۋىسترۋ ءۇشىن ونى جوبالاۋعا بىرنەشە اي كەتەدى. ياعني، جۇمىس ىستەپ تۇرعان ترۋبينانى جاڭاسىنا اۋىستىرۋعا جارتى جىل مەرزىم قاجەت بولادى»، - دەدى ساراپشى.
ساراپشى ەلەكتر ەنەرگياسى ءتاريفىنىڭ كوتەرىلۋىنەن نە كۇتۋگە بولاتىندىعىنا قاتىستى دا پىكىرىمەن ءبولىستى.
«ەگەر تاريف كوتەرىلسە، وندا جۇمىسشىلاردىڭ دا جالاقىسى قازىرگىدەن جىلدام ارتا تۇسەدى. ەكىنشىدەن، قۇرال-جابدىقتاردىڭ توزۋىن تەجەي الامىز. ياعني، قۇرال-جابدىقتار ساپاسى جاقسارا تۇسەدى. وسىنىڭ ارقاسىندا جاڭا ستانسالار پايدا بولىپ، تولىقتاي جاڭعىرتىلۋ جۇرگىزىلەدى دەۋگە كەلمەيدى. وعان قاراجات تا جەتپەيدى. جاڭا قۇرال-جابدىقتار سالىپ، ەسكىسىن اۋىستىرۋ ءۇشىن ءتاريفتى ەكى ەسە كوتەرۋ قاجەت. ال بۇل تۇرعاندار، كاسىپورىن ءۇشىن ۇلكەن جۇكتەمە. ءتاريفتى بىرتىندەپ كوتەرۋ كەم دەگەندە قازىرگى ۋاقىتتا قولدانىستاعى قۇرال-جادبىقتاردىڭ جاي-كۇيىنىڭ ناشارلاۋىن تەجەيتىندىگى ءسوزسىز»، - دەدى الىشەر قۇرباناليەۆ.
بارلىق قۇقىقتار قورعالعان. inform.kz بەلسەندى سىلتەمەنى پايدالانىڭىز https://www.inform.kz/kz/sarapshy-elektr-energiyasy-tarifinin-koteriluine-katysty-pikir-bildirdi_a3762000
