Elektr qýaty tarıfiniń kóterilýine ne sebep bolǵany jóninde energetıka jónindegi sarapshy, ekonomıka ǵylymdarynyń kandıdaty Álisher Qurbanálıev pikir bildirdi, dep habarlaıdy «Adyrna» QazAqparatqa silteme jasap.
Aıta keteıik, Energetıka mınıstrligi elektr energııasyna arnalǵan tarıfterdi kóterý týraly buıryǵynyń jobasyn jarııalady. Qujat naýryzdyń 26-syna deıin talqylaýǵa shyǵaryp otyr. Osyǵan oraı energetıka jónindegi sarapshy atalǵan buıryqqa qatysty túsindirme berdi.
«Elektr energııasy – bul elektr óndiretin stansalar satatyn jalǵyz taýar. Kez kelgen óndirýshi ónimin satyp, túsken kiris esebinen óziniń barlyq shyǵyndaryn jabýǵa tyrysady. Oǵan óndiristik shyǵyndar, onyń ishine jumysshylardyń jalaqysy, shyǵyndalatyn materıaldar, otyn kiredi. Bul stansa jumysynyń odan ary jalǵasýynyń negizi sanalady», - dedi sarapshy.
Onyń atap ótýinshe, kez kelgen jabdyqty jańartý, jóndeý jáne aýystyryp otyrý qajet. Óıtkeni elimizdiń elektr energetıka nysandary Keńes odaǵy zamanynan qalǵan ári eskirgen.
«Kez kelgen jabdyqty jańartyp, jóndep, aýystyryp otyrý kerek. Qajetti deńgeıge deıin tarıftiń kóterilmeýi saldarynan stansalar qajetti jóndeý jumystaryn júrgize almaı otyr. Energetıkter úıimizde sham sónip qalmaýy úshin elektr energııasymen senimdi ári sapaly qamtamasyz etýge mindetti. Biraq, olar qyzmetkerlerine jalaqy tóleý, agentterge kelisimshart boıynsha tólem jasaý úshin qarajatyn únemdeýge, basqa da joldaryn únemi izdeýge májbúr. Olar jóndeý jumystaryn júrgizip úlgermeı jatyr. Sondyqtan tarıfti kóterý stansalarǵa atalǵan is-sharalardy atqarý úshin qajet», - dedi ol.
Sonymen qatar ol elektr energııasyna tarıf kóterilgennen keıin osy aıdyń ishinde, nemese osy jylda elimizdiń barlyq elektr energetıkasy jańartylady deýge kelmeıdi.
«Tipti, qarapaıym týrbınanyń ózin aýystrý úshin ony jobalaýǵa birneshe aı ketedi. Iaǵnı, jumys istep turǵan trýbınany jańasyna aýystyrýǵa jarty jyl merzim qajet bolady», - dedi sarapshy.
Sarapshy elektr energııasy tarıfiniń kóterilýinen ne kútýge bolatyndyǵyna qatysty da pikirimen bólisti.
«Eger tarıf kóterilse, onda jumysshylardyń da jalaqysy qazirgiden jyldam arta túsedi. Ekinshiden, qural-jabdyqtardyń tozýyn tejeı alamyz. Iaǵnı, qural-jabdyqtar sapasy jaqsara túsedi. Osynyń arqasynda jańa stansalar paıda bolyp, tolyqtaı jańǵyrtylý júrgiziledi deýge kelmeıdi. Oǵan qarajat ta jetpeıdi. Jańa qural-jabdyqtar salyp, eskisin aýystyrý úshin tarıfti eki ese kóterý qajet. Al bul turǵandar, kásiporyn úshin úlken júkteme. Tarıfti birtindep kóterý kem degende qazirgi ýaqytta qoldanystaǵy qural-jadbyqtardyń jaı-kúıiniń nasharlaýyn tejeıtindigi sózsiz», - dedi Álisher Qurbanálıev.
Barlyq quqyqtar qorǵalǵan. inform.kz belsendi siltemeni paıdalanyńyz https://www.inform.kz/kz/sarapshy-elektr-energiyasy-tarifinin-koteriluine-katysty-pikir-bildirdi_a3762000
