ر.ب. سۇلەيمەنوۆ اتىنداعى شىعىستانۋ ينستيتۋتىنىڭ ۇجىمى جانە جالپى جۇرتشىلىق شىعىستانۋ عىلىمىنىڭ الىبى، قازاقتىڭ ۇلى عالىمى تيمۋر قاسىمۇلى بەيسەمبيەۆپەن قوشتاسىپ، اسىل ازاماتتىڭ ءمايىتى جەر قويىنىنا تاپسىرىلدى.
تيمۋر قاسىمۇلى بەيسەمبيەۆ 1955 جىلدىڭ 8 ماۋسىمى كۇنى الماتى قالاسىندا قازاقتىڭ زيالى وتباسىندا دۇنيەگە كەلگەن. اكەسى – قاسىم بەيسەمبيەۆ (1919-1980) فيلوسوفيا عىلىمدارىنىڭ دوكتورى، پروفەسسور، قازاقتان شىققان العاشقى فيلوسوف-عالىمداردىڭ ءبىرى. اناسى – فيلولوگيا عىلىمدارىنىڭ دوكتورى، پروفەسسور ۆالەنتينا ايتەشەۆنا يسەنگاليەۆا (1924 ج.ت.).
تيمۋر قاسىمۇلى 1977 جىلى قازاق مەملەكەتتىك ۋنيۆەرسيتەتىنىڭ تاريح فاكۋلتەتىن بىتىرەدى. 1980-1983 جىلدارى وزبەك كسر-ءى عا شىعىستانۋ ينستيتۋتىنىڭ اسپيرانتۋراسىندا وقىپ (تاشكەنت), 1983 جىلى وزبەكستاننىڭ شىعىستانۋ ينستيتۋتىندا ««تاʼريح-ي شاحرۋح» تاريحي دەرەككوز رەتىندە» تاقىرىبى بويىنشا كانديداتتىق ديسسەرتاتسياسىن قورعايدى. ول شەت تىلدەرىن جەتىك مەڭگەرگەن، 12 تىلدە ەركىن سويلەيدى: ورىس، اعىلشىن، فرانتسۋز، نەمىس، پارسى، شاعاتاي تۇركي، كونەگرەك، لاتىن، گوللاند، پولياك، افريكاانس، وسمان تۇرىكتەرى، وزبەك، تاجىك جانە ت.ب.
1983-1991 جىلدارى ش. ءۋاليحانوۆ اتىنداعى تاريح جانە ارحەولوگيا ينتسيتۋتىنىڭ، 1991 جىلدان باستاپ قر بعم عك ر.ب. سۇلەيمەنوۆ اتىنداعى شىعىستانۋ ينستيتۋتىنىڭ ح-ءحىح عاسىرلارداعى ورتا ازيا جانە قازاقستاننىڭ تاريحى مەن مادەنيەتى بويىنشا كوپتەگەن عىلىمي جوبالارعا قاتىستى.
1992-1993 جىلدارى ينديانا ۋنيۆەرسيتەتىندە (اقش), 1995 جىلى بريتان اكادەمياسىنىڭ شاقىرىلعان پروفەسسورى رەتىندە لوندوننىڭ شىعىس قولجازبالار قورى مەن كىتاپحانالارىندا، 1997 جىلى وكسفوردتا شاقىرىلعان عالىم رەتىندە جۇمىس اتقارادى.
1999-2002 جىلدارى ستاجيروۆكادان ءوتۋ جانە عىلىمي زەرتتەۋلەر جۇرگىزۋ ماقساتىندا يراندا ەڭبەك ەتتى. 2001-2002 جىلدارى جانە 2006 جىلى قوعامدىق عىلىمدار ءۇيىنىڭ شاقىرتۋىمەن پاريجدە زەرتتەۋ جۇمىستارىن جۇرگىزدى (فرانتسيا). 2005-2006 جىلدارى وكسفوردتا شاقىرىلعان پروفەەسور رەتىندە التىايلىق گرانتقا يە بولىپ، 2005 جىلدىڭ شىلدەسىندە توكيونىڭ چۋو ۋنيۆەرسيتەتىندە (جاپونيا) شاقىرىلعان پروفەسسور رەتىندە قىزمەت ەتتى. 2006-2007 جىلدارى توكيونىڭ شەتەلدىك زەرتتەۋلەر ۋنيۆەرسيتەتى جانىنداعى ازيا جانە افريكانىڭ تىلدەرى مەن مادەنيەتىن زەردەلەۋ جونىندەگى زەرتتەۋ ينستيتۋتىنىڭ شاقىرىلعان پروفەسسورى رەتىندە قىزمەت ەتتى.
ماراپاتتارى: 1988 ج. قازكسر عا-نىڭ جاس عالىمدار اراسىنداعى ۇزدىك جۇمىسى ءۇشىن مەدالىمەن ماراپاتتالعان.
1973-2010 جىلدار ارالىعىندا 6 كىتاپ، 200 عىلىمي ماقالا جاريالاعان. 2 كىتابى مەن 23 ماقالاسى اعىلشىن تىلىندە جارىق كورگەن.
بۇكىل ءومىرىن عىلىم جولىنا ارناعان دەرەكتانۋدىڭ اسا ءىرى بىلگىر مامانى، الەم مويىنداعان ۇلى عالىمنىڭ ارتىندا وشپەيتىن عىلىمي مول مۇراسى قالدى. ول باستاعان جولدىڭ شەتى شەكسىز، ۇلانعايىر ۇلى جول.
مارقۇمنىڭ ارتىندا توقساننىڭ تورىنە شىققان اناسى، ءومىرىنىڭ كوبىن بىرگە وتكىزبەسە دە دۇنيەگە مۇراگەرى ۇلىن اكەلگەن جارى، ۇلى تيمۋر قالدى. تۋىس-تۋعاندارى مەن قىزمەت ەتكەن كيەلى شاڭىراق شىعىستانۋ ينستيتۋتىنىڭ ۇجىمىنا، شىعىستانۋشى، تاريحشى، دەرەكتانۋشى جانە ت.ب. تيمۋر اعانى تانيتىن اعايىنعا قاتتى قايعىرىپ كوڭىل ايتامىن. جاتقان جەرى جارىق، توپىراعى تورقا بولسىن!
باعدات دۇيسەنوۆ،
قر بعم عك ر.ب.سۇلەيمەنوۆ اتىنداعى شىعىستانۋ ينستيتۋتىنىڭ عىلىمي قىزمەتكەرى
