قوستاناي وبلىسى پوليتسيا دەپارتامەنتىنىڭ باستىعى بەكەت ايماعامبەتوۆ 8 ناۋرىزعا قاراعان ءتۇنى قوستاناي پوليتسياسىنىڭ قىزمەتكەرى جاساعان قىلمىستىڭ جاي-جاپسارىن باياندادى. جانجالداسقان ەكەۋ سىنىپتاس ەكەنى انىقتالدى، دەپ حابارلايدى “ادىرنا” ۇلتتىق پورتالى Sputnik قازاقستان سايتىنا سىلتەمە جاساپ.
وبلىس پوليتسياسىنىڭ باستىعى قارسىلاسىن تىركەلگەن قارۋمەن اتىپ تاستاعان قىزمەتكەردىڭ دەپارتامەنت قۇرىلىمىندا باسشىلىق قىزمەت اتقارماعانىن، قاراپايىم باعدارلاماشى بولعانىن اتاپ ءوتتى. ول قاقتىعىسقا نە سەبەپ بولعانىن دا حابارلادى.
"ەكى سىنىپتاستىڭ اراسىندا جانجال شىققان. ول وننان استام ادام تىركەلگەن چاتتا جالعاسقان. باعدارلاماشىعا سىنىپتاسى قوقان-لوقى جاساعان", - دەپ جازدى ايماعامبەتوۆ ءوزىنىڭ Facebook پاراقشاسىندا.
ونىڭ ايتۋىنشا، پوليتسەيدىڭ سىنىپتاسى وعان قارۋلى ادامدار جىبەرگەنىن ايتىپ، ولتىرەمىن دەپ قورقىتقان. ونداي حابارلامانى بىرنەشە رەت جازعان.
"بۇرىن سوتتالعان سىنىپتاس ىشىمدىك ءىشىپ، 8 ناۋرىزدا تۇنگى ساعات ءۇش شاماسىندا تانىسىمەن بىرگە پوليتسەيدىڭ ۇيىنە كەلگەن. ول وعان تاعى دا قوقان-لوقى جاساعان. ءوزىنىڭ اتىنا تىركەلگەن قارۋدى الىپ شىققان پوليتسەي وق اتقان، جابىرلەنۋشى كوز جۇمدى", - دەدى قوستاناي وبلىسى پوليتسيا دەپارتامەنتىنىڭ باستىعى.
ايماعامبەتوۆ قازىرگى ۋاقىتتا پوليتسيا قىزمەتكەرى قاماۋعا الىنعانىن حابارلادى.
قازاقستان قىلمىستىق كودەكسىنىڭ 99-بابى 1-بولىگى – "ادام ءولتىرۋ" بويىنشا سوتقا دەيىنگى تەرگەۋدەن بولەك، ىشكى قاۋىپسىزدىك باسقارماسىنىڭ قىزمەتكەرلەرى قىزمەتتىك تەكسەرىس جۇرگىزىپ جاتىر. ءىس ەرەكشە باقىلاۋعا الىندى.
