1 ناۋرىزدا قازاقستان ساۋدا جانە ينتەگراتسيا ۆيتسە-ءمينيسترى قايرات تورەباەۆ پەن قىتاي كوممەرتسيا ۆيتسە-ءمينيسترى ۆان شوۋۆەن كەزدەستى. بۇل تۋرالى ساۋدا جانە ينتەگراتسيا مينيسترلىگىنىڭ ءباسپاسوز قىزمەتى حابارلادى.
ۆەدومستۆو مالىمەتىنشە، قوس تاراپ قازاقستان-قىتاي "قورعاس" شەكارا ماڭى ىنتىماقتاستىعى حالىقارالىق ورتالىعىنىڭ قىزمەتىن ۇيلەستىرۋ تەتىگىنىڭ 2-وتىرىسىنا دايىندىق بويىنشا كەلىسسوزدەر جۇرگىزگەن.
قايرات تورەباەۆ قازاقستان مەن قىتايدىڭ ساۋدا-ەكونوميكالىق قاتىناستارى قارقىندى سيپاتقا يە ەكەنىن اتاپ وتكەن.
– قىتاي قازاقستاننىڭ ەڭ ءىرى ينۆەستورلارىنىڭ بەستىگىنە كىرەدى. قازاقستانعا قۇيىلعان بارلىق ينۆەستيتسيانىڭ 4,7 پايىزىن قۇرايدى. 2005-2020 جىلدار ارالىعىندا قىتاي قازاقستانعا 19,2 ملرد دوللار ينۆەستيتسيا قۇيدى.
يندۋستريالىق-ينۆەستيتسيالىق ىنتىماقتاستىق باعدارلاماسى اياسىندا 24,5 ملرد دوللارعا 56 زاماناۋي كاسىپورىن سالۋ جوسپارلانىپ وتىر. بۇل نىسانداردىڭ باسىم بولىگى 2023 جىلعا قاراي اياقتالادى دەپ كۇتىلۋدە، – دەدى قايرات تورەباەۆ.
ونىڭ ايتۋىنشا، قازىرگى ۋاقىتتا "قورعاس" شەكارا ماڭى ىنتىماقتاستىعى حالىقارالىق ورتالىعىنىڭ قازاقستان اۋماعىندا جالپى سوماسى 110,37 ملرد تەڭگەگە 29 ينۆەستيتسيالىق جوبانى ىسكە اسىرۋ بويىنشا 24 ينۆەستيتسيالىق كومپانيا ءوز قىزمەتىن جۇزەگە اسىرىپ جاتىر. شامامەن 30 000 شارشى مەترى پايدالانۋعا بەرىلدى، 1 جوبا 100 پايىزعا ىسكە اسىرىلدى. 12 جوبا بويىنشا قۇرىلىس جۇمىستارى جۇرگىزىلۋدە، ال قالعاندارى جوبالانىپ جاتىر.
