بىلتىر بالقاش قالاسىندا 13 جاسار قىزدى زورلاعان پوليتسەي 14 جىلعا باس بوستاندىعىنان ايىرىلدى، دەپ حابارلايدى جەرگىلىكتى "موي گورود" باسىلىمى.
ال ءتارتىپ ساقشىلارى كۇدىككە ىلىنگەن ارىپتەستەرىن وبلىس اۋماعىنان قاشىپ كەتۋگە ارەكەتتەنگەن كەزىندە تۇتقىنداعان.
2020 جىلدىڭ جازىندا پوليتسيا قىزمەتكەرى 13 جاستاعى قىزدىڭ اناسىنا حابارلاسىپ، ولاردىڭ ساياجايىندا قاراسورا وسەتىنىن ايتقان. وسى جايتتىڭ انىق-قانىعىن ءبىلۋ ماقساتىندا جانە جەرگىلىكتى بالالاردان سۇراق-جاۋاپ الۋ ءۇشىن ساياجايدا تۇرعان قىزىنىڭ تەلەفون ءنومىرىن سۇراعان.
ودان كەيىن پوليتسەي جاسوسپىرىمگە: "سەنىڭ ساياجايدا ماريحۋانا شەككەنىڭ تۋرالى مەندە اقپارات بار" دەپ جازىپ، مۇنداي ارەكەت ءۇشىن اكەسىن 10 جىلعا باس بوستاندىعىنان ايىرۋعا بولاتىنىن ەسكەرتىپ، قورقىتقان. ءتىپتى، كەيبىر قۇجاتتارعا قول قويۋ ءۇشىن وزىمەن كەزدەسۋدى تالاپ ەتكەن.
كەزدەسۋ كەزىندە ول قىزدى ودان سايىن قورقىتىپ، ءوزىنىڭ دوستارىمەن بىرگە ماريحۋانا قولدانىپ جۇرگەنى تۋرالى جالانى مويىنداۋعا ءماجبۇر ەتەدى. ول وسىنداي "مويىنداۋدى" قۇجات جۇزىندە تولتىرىپ بولعان سوڭ، بۇل تۋرالى اتا-اناسىنا ءتىس جارماۋى ءۇشىن ءجاسوسپىرىمدى بوپسالاپ، جىنىستىق قاتىناسقا تۇسكەن.
باستاپقى كەزدە قىزدىڭ اتا-اناسى بەرگەن ارىز بويىنشا پوليتسەيلەر ءىس قوزعاۋدان باس تارتىپ، ءوز ارىپتەستەرىن قىزمەتتەن قۋمەن عانا شەكتەلگەن.
كەيىننەن ەكس-پوليتسەي ءجاسوسپىرىمنىڭ اتا-اناسىنان كەشىرىم سۇراپ، ارىزدى قايتارىپ الۋدى وتىنگەن. ءتىپتى، ءجاسوسپىرىمدى ءسۇيىپ قالعاندىعىن دا ايتىپ اقتالعان.
