تۇركىستان وبلىسىندا ءار ۇيدەگى گاز قۇرىلعىلارىنىڭ ورناتىلۋ ءتارتىبى جاپپاي تەكسەرىلەدى. تابيعي گازدى تۇرمىستا پايدالانۋ كەزىندەگى قاۋىپسىزدىك تالاپتارى تولىق ساقتالۋى ءتيىس دەپ حابارلايدى «ادىرنا» ۇلتتىق پورتالى تۇركىستان وبلىستىق ءباسپاسوز قىزمەتىنە سىلتەمە جاساپ.
تۇركىستان وبلىسىنىڭ اكىمى ومىرزاق شوكەەۆ اپتالىق ماجىلىستە وسىنداي تاپسىرما بەردى. وبلىس باسشىسى گاز پەشتەرىن ورناتۋدا جىبەرىلگەن قاتەلىكتەر ءۇشىن جاۋاپتىلارعا شارا كورۋدى مىندەتتەدى.
«بۇگىننەن باستاپ، بارلىق اكىمدەرگە دە ايتامىن، گاز كىرگەن جەرلەردىڭ بارلىعىن تەكسەرىپ شىعۋ كەرەك. شۇعىل تۇردە. ءار اۋلانى ارالاپ ءجۇرىپ، تەكسەرۋ كەرەك. قاجەت بولسا، سول گازدى ورناتقان مەكەمەنى جازالاۋ كەرەك»، –دەدى وبلىس اكىمى.
وبلىس باسشىسىنىڭ توراعالىعىمەن وتكەن وتىرىستا ورتالىقتاندىرىلعان گاز جۇيەسىنە قوسىلعان تۇرعىن ۇيلەردى تولىقتاي تەكسەرىپ شىعۋ، جازاتايىم وقيعانىڭ الدىن الۋ جۇكتەلدى. تالاپ بۇزىلعاندار تابيعي گازدان اجىراتىلۋى مۇمكىن. وسى ماسەلەگە قاتىستى وبلىستىق تجد باسشىسى نۇرعالي ءجۇنىسوۆ بايانداما جاسادى. ايتۋىنشا، جىلىتۋ ماۋسىمى باستالعالى ۇگىت-ناسيحات جۇمىستارىنىڭ بارىسىندا 45 مىڭنان استام ءورت قاۋىپسىزدىگىنىڭ كەمشىلىكتەرى انىقتالىپ، رەتكە كەلتىرىلگەن.
«ارنايى توپ كامين پەشتەر پايدالانباۋعا، ودان بولەك شاتىردان شىققان قۇبىرلاردى دا بەكىتىپ قويۋعا قاتىستى تۇسىندىرمە جۇمىستارىن جۇرگىزەدى. وكىنىشكە وراي، تۇرعىنداردىڭ كوپشىلىگى ءبىز كەتكەن سوڭ، قايتادان ءوز دەگەندەرىن ىستەپ، قاۋىپسىزدىك ەرەجەلەرىن بۇزۋدا. وعان دالەل، ەكىنشى رەت بارعاندا انىقتالىپ جاتقان فاكتىلەر دە بار. توتەنشە جاعداي سالاسى تاراپىنان وسى كامين پەشتەرىن پايدالانعانى ءۇشىن اكىمشىلىك شاراعا تارتۋ نەمەسە ونى توقتاتۋ تالاپتارى قاراستىرىلماعان»، – دەدى دەپارتامەنت باسشىسى.
وبلىس اۋماعىندا جالپى 376 مىڭنان استام جەكە تۇرعىن ۇيلەر ەسەپكە الىنعان. ونىڭ 204 مىڭنان استامى تابيعي گاز پايدالانادى. بۇدان بولەك، وڭىردە 1,5 مىڭعا جۋىق كوپقاباتتى تۇرعىن ۇيلەر ورنالاسقان.
