Túrkistan oblysynda ár úıdegi gaz qurylǵylarynyń ornatylý tártibi jappaı tekseriledi. Tabıǵı gazdy turmysta paıdalaný kezindegi qaýipsizdik talaptary tolyq saqtalýy tıis dep habarlaıdy «Adyrna» ulttyq portaly Túrkistan oblystyq baspasóz qyzmetine silteme jasap.
Túrkistan oblysynyń ákimi Ómirzaq Shókeev aptalyq májiliste osyndaı tapsyrma berdi. Oblys basshysy gaz peshterin ornatýda jiberilgen qatelikter úshin jaýaptylarǵa shara kórýdi mindettedi.
«Búginnen bastap, barlyq ákimderge de aıtamyn, gaz kirgen jerlerdiń barlyǵyn tekserip shyǵý kerek. Shuǵyl túrde. Ár aýlany aralap júrip, tekserý kerek. Qajet bolsa, sol gazdy ornatqan mekemeni jazalaý kerek», –dedi oblys ákimi.
Oblys basshysynyń tóraǵalyǵymen ótken otyrysta ortalyqtandyrylǵan gaz júıesine qosylǵan turǵyn úılerdi tolyqtaı tekserip shyǵý, jazataıym oqıǵanyń aldyn alý júkteldi. Talap buzylǵandar tabıǵı gazdan ajyratylýy múmkin. Osy máselege qatysty oblystyq TJD basshysy Nurǵalı Júnisov baıandama jasady. Aıtýynsha, jylytý maýsymy bastalǵaly úgit-nasıhat jumystarynyń barysynda 45 myńnan astam órt qaýipsizdiginiń kemshilikteri anyqtalyp, retke keltirilgen.
«Arnaıy top kamın peshter paıdalanbaýǵa, odan bólek shatyrdan shyqqan qubyrlardy da bekitip qoıýǵa qatysty túsindirme jumystaryn júrgizedi. Ókinishke oraı, turǵyndardyń kópshiligi biz ketken soń, qaıtadan óz degenderin istep, qaýipsizdik erejelerin buzýda. Oǵan dálel, ekinshi ret barǵanda anyqtalyp jatqan faktiler de bar. Tótenshe jaǵdaı salasy tarapynan osy kamın peshterin paıdalanǵany úshin ákimshilik sharaǵa tartý nemese ony toqtatý talaptary qarastyrylmaǵan», – dedi departament basshysy.
Oblys aýmaǵynda jalpy 376 myńnan astam jeke turǵyn úıler esepke alynǵan. Onyń 204 myńnan astamy tabıǵı gaz paıdalanady. Budan bólek, óńirde 1,5 myńǵa jýyq kópqabatty turǵyn úıler ornalasqan.
