20 اقپان كۇنى قوستاناي وبلىسىنىڭ امانگەلدى اۋدانى ءبىرالى قىستاعىنان جىلقى قايىرامىن دەپ شىققان امانگەلدى تۇرجانوۆ قاتتى بورانعا تاپ بولادى. ال ول كىسىنىڭ ءىز-ءتۇسسىز جوعالعانى جايلى جاقىندارى توتەنشە جاعدايلار قىزمەتىنە 21 اقپاندا حابارلايدى.
ىزدەستىرۋ-قۇتقارۋ شارالارىنا توتەنشە جاعداي، پوليتسيا قىزمەتكەرلەرىمەن قوسا جەرگىلىكتى تۇرعىندار دا بەلسەنە ات سالىسىپ، نۇرسۇلتان قالاسىنان ارنايى تىكۇشاق تا جۇمىلدىرىلادى. الايدا اۋا-رايىنىڭ قولايسىزدىعىنا بايلانىستى ىزدەۋ امالدارى ەش ناتيجە بەرمەگەن. تەك اراعا اپتا سالىپ، امانگەلدى تۇرجانوۆ قوستاناي جانە قاراعاندى وبلىستارى شەكتەسەتىن اۋماقتان امان-ەسەن تابىلادى.
اداسقانىمدى اراعا 2-3 ساعات سالىپ تۇسىنە باستادىم. اق تۇتەك بوران كوتەرىلە باستاعاسىن، پانالايتىن جەر كەزىگەر مە دەپ ىعىپ جۇرە بەردىم. 3 كۇن اتقا ءوز كۇشىممەن ءمىنىپ ءتۇسىپ ءجۇردىم، دەنە جاتتىعۋلارىن جاساپ، امان قالۋدىڭ امالدارىن جاساۋعا تىرىسىپ باقتىم. - دەيدى جىلقىشى.
بىرنەشە كۇن ءنار تاتپاعان ازامات كەيىن ءالى كەتىپ، قالجىراپ، بارىنەن كۇدەر ءۇزىپ، اقىرى ورنىنان تۇرا الماي جاتىپ قالعانىن ايتادى.
بەسىنشى كۇن دەگەندە اتىمنىڭ قار استىنان ءشوپ جەپ جاتقانىن بايقاپ، مەن دە كورمەك بولدىم. باسىندا قيىنداۋ بولدى، دەگەنمەن ەكى كۇن بويى سونى قورەك ەتۋمەن بولدىم. قاتتى قينالعان ساتتەرىمدە مارقۇم انام ەلەستەۋمەن بولدى. وزىمەن الىپ كەتۋىن جالىنىپ سۇراعانىمدا، قول سىلتەپ كەتە باردى. ارتىنشا 15-20 مينۋتتان سوڭ تىكۇشاقتى بايقادىم. ءبىرىنشى بولىپ ۇلىم جۇگىرىپ كەپ قۇشاقتاعانى عانا ەسىمدە.
اس-سۋسىز ايدالانى جەتى كۇن تۇنەگەن جىلقىشى ءوزىن ومىرگە قايتا كەلگەندەي سەزىنەدى. ءبىر ولىمنەن قالۋىنىڭ سەبەبىن ەشكىمگە ەش قيانات جاساماي، ادال ەڭبەك ەتۋىمەن بايلانىستىرادى.
ابىروي بولعاندا، اپتا بويى اق بوران مەن قاقاعان ايازدا يەن دالانى مەكەن ەتكەن مالشىنىڭ دەنساۋلىعىنا اۋىر زاقىم كەلمەگەن، ازداپ ساۋساقتارىنىڭ ۇشىن ۇسىك شالعان. قازىر ول جەزقازعان قالاسىندا اۋرۋحانادا ەم قابىلداۋدا.
نازگۇل شابداروۆا،
«ادىرنا» ۇلتتىق پورتالى
