«Shóp pen qardy qorek ettim»

5029
Adyrna.kz Telegram

20 aqpan kúni Qostanaı oblysynyń Amangeldi aýdany Biráli qystaǵynan jylqy qaıyramyn dep shyqqan Amangeldi Turjanov qatty boranǵa tap bolady. Al ol kisiniń iz-tússiz joǵalǵany jaıly jaqyndary tótenshe jaǵdaılar qyzmetine 21 aqpanda habarlaıdy.

Izdestirý-qutqarý sharalaryna tótenshe jaǵdaı, polıııa qyzmetkerlerimen qosa jergilikti turǵyndar da belsene at salysyp, Nursultan qalasynan arnaıy tikushaq ta jumyldyrylady. Alaıda aýa-raıynyń qolaısyzdyǵyna baılanysty izdeý amaldary esh nátıje bermegen. Tek araǵa apta salyp, Amangeldi Turjanov Qostanaı jáne Qaraǵandy oblystary shektesetin aýmaqtan aman-esen tabylady.

Adasqanymdy araǵa 2-3 saǵat salyp túsine bastadym. Aq tútek boran kóterile bastaǵasyn, panalaıtyn jer keziger me dep yǵyp júre berdim. 3 kún atqa óz kúshimmen minip túsip júrdim, dene jattyǵýlaryn jasap, aman qalýdyń amaldaryn jasaýǵa tyrysyp baqtym. - deıdi jylqyshy.

Birneshe kún nár tatpaǵan azamat keıin áli ketip, qaljyrap, bárinen kúder úzip, aqyry ornynan tura almaı jatyp qalǵanyn aıtady.

Besinshi kún degende atymnyń qar astynan shóp jep jatqanyn baıqap, men de kórmek boldym. Basynda qıyndaý boldy, degenmen eki kún boıy sony qorek etýmen boldym. Qatty qınalǵan sátterimde marqum anam elesteýmen boldy. Ózimen alyp ketýin jalynyp suraǵanymda, qol siltep kete bardy. Artynsha 15-20 mınýttan soń tikushaqty baıqadym. Birinshi bolyp ulym júgirip kep qushaqtaǵany ǵana esimde.

As-sýsyz aıdalany jeti kún túnegen jylqyshy ózin ómirge qaıta kelgendeı sezinedi. Bir ólimnen qalýynyń sebebin eshkimge esh qııanat jasamaı, adal eńbek etýimen baılanystyrady.

Abyroı bolǵanda, apta boıy aq boran men qaqaǵan aıazda ıen dalany meken etken malshynyń densaýlyǵyna aýyr zaqym kelmegen, azdap saýsaqtarynyń ushyn úsik shalǵan. Qazir ol Jezqazǵan qalasynda aýrýhanada em qabyldaýda.

Nazgúl ShABDAROVA,
«Adyrna» ulttyq portaly

Pikirler