بۇگىن كوكتەمنىڭ جادىراعان العاشقى كۇنىندە حالقىمىز العىم ايتۋ كۇنىن تويلايدى، دەپ حابارلايدى “ادىرنا” ۇلتتىق پورتالى.
2016 جىلعى 14 قاڭتاردا ەلباسى نۇرسۇلتان نازارباەۆ № 173 جارلىققا قول قويعان بولاتىن. ول جارلىققا سايكەس، قازاقستان حالقى اسسامبلەياسى قۇرىلعان 1 ناۋرىز – ەلىمىزدە العىس ايتۋ كۇنى دەپ جاريالاندى. ءدال سول جىلى ەلىمىز ءوز تاريحىندا تۇڭعىش رەت العىس ايتۋ كۇنىن اتاپ وتكەن ەدى.
«ستاليندىك رەجىم كەزىندە قازاقستانعا كوپتەگەن حالىقتار جەر اۋدارىلدى – 800 مىڭعا جۋىق نەمىس، 102 مىڭ پولياك، 550 مىڭ سولتۇستىك كاۆكاز حالقىنىڭ وكىلدەرى، 18,5 مىڭ قيىر شىعىستاعى كورەي وتباسىلارى كوشىپ كەلۋگە ءماجبۇر بولدى. ولاردى پويىز ۆاگوندارىنان جاپان دالاعا ءتۇسىرىپ كەتتى. ول كەزدەرى مۇندا تەك قازاقتار ءومىر ءسۇردى. سوندىقتان، ولار قابىل الىپ، كومەك كورسەتتى. قيىن ۋاقىتتاردى باستان وتكەرىپ جۇرگەن قازاق وتباسىلارى بالشىق ۇيلەرىنە كىرگىزىپ، قابىلدادى. ءبىزدىڭ جانۇيامىز دا ءۇش بالاسى بار ەرلى-زايىپتىنى قابىلدادى. قازاقستان حالقى اسسامبلەياسىنىڭ قۇرىلعان كۇنىن – 1 ناۋرىزدى جىل سايىن بارلىق ەتنوستاردىڭ ءبىر-بىرىنە مەيىرىمدىلىك كورسەتەتىن، ءتۇرلى حالىقتاردى تۋعانىنداي قابىلداعان قازاقتارعا العىس ايتۋ كۇنى دەپ اتاپ وتكەن دۇرىس بولار ەدى. بۇل ءبىزدى ودان ءارى جاقىنداستىرار ەدى. بۇل كۇن بارلىق قازاقستاندىقتاردىڭ ءبىر-بىرىنە مەيىرىمدىلىك، دوستاستىق جانە ماحاببات تانىتۋ مەرەكەسى بولا الادى»، – دەگەن ەدى ەلباسى نۇرسۇلتان نازارباەۆ 2015 جىلدىڭ 22 ءساۋىرى كۇنى قحا-نىڭ XXII سەسسياسى بارىسىندا.
العىس ايتۋ كۇنى- ىنتىماقتاستىققا باستايتىن مەرەكە.
