اقمولالىق پوليتسەيدىڭ 6 جاسار قىزى جانىپ جاتقان كولىكتى بايقاپ، دەر كەزىندە اتا-اناسىنا ايتىپ بەرگەن، دەپ حابارلايدى «ادىرنا» ءتىلشىسى Polisia.kz-كە سىلتەمە جاساپ.
25 اقپان كۇنى شامامەن تۇنگى ساعات 23:00-دە اقمولا وبلىسى پد جەرگىلىكتى پوليتسيا قىزمەتى باسقارماسى باستىعى سەرىك بايمۇقانوۆتىڭ 6 جاسار قىزى نۇريا ۇيىقتاۋعا بارا جاتىپ، تەرەزەدەن كوكشەتاۋ قالاسىنىڭ يۋبيلەينىي شاعىن اۋدانىنداعى ۇيلەردىڭ ءبىرىنىڭ اۋلاسىندا تۇرعان كولىكتىڭ استىنان شىعىپ جاتقان ۇشقىنداردى كورىپ قالعان.
قاۋىپتى جاعدايلاردا نە ىستەۋ كەرەك ەكەنىن جاقسى بىلەتىن نۇريا بىردەن اكەسىنە حابارلاعان. سەرىك كەرىمبايۇلى اناسى مەن ايەلىنە ءورت ءسوندىرۋ قىزمەتىنە قوڭىراۋ شالۋدى تاپسىرىپ، ويلانباستان كوشەگە شىققان. ءورت شىققان كولىكتىڭ جانىندا باسقا دا كولىك قۇرالدارى تۇرعان. ول باسقا كولىك قۇرالدارىنىڭ دابىلىن ىسكە قوسىپ، كولىك يەلەرىنىڭ نازارىن اۋدارۋ ءۇشىن ولاردى سوعا باستاعان. بۇدان كەيىن كولىك يەلەرى تىسقا شىققاندا كولىكتەردى ءورت وشاعىنان الىستاتۋدى ءوتىنىپ، سىرتقا شىققان جاستارمەن بىرگە ءورت وشاعىن وقشاۋلاۋعا كىرىسكەن.
وسىلايشا، كىشكەنتاي قىزدىڭ قىراعىلىعىنىڭ ارقاسىندا ۇلكەن اپاتتىڭ جولى كەسىلدى.
«ادىرنا» ۇلتتىق پورتالى
