جەر شەتەلدىكتەرگە ساتىلمايتىنى تۋرالى تۇبەگەيلى شەشىم قابىلداندى. بۇل تۋرالى ۇلتتىق قوعامدىق سەنىم كەڭەسىنىڭ 5-وتىرىسىندا قر پرەزيدەنتى قاسىم-جومارت توقاەۆ ايتتى، دەپ حابارلايدى قازاقپارات ءتىلشىسى.
«كوميسسيا (جەر رەفورماسى جونىندەگى كوميسسيا) جۇمىسىنىڭ ءاربىر كەزەڭى جانە وندا ۇسىنىلعان شارالار تۋرالى حالىقتى ۇنەمى حاباردار ەتىپ وتىرۋ كەرەك. باستى مىندەتتىڭ ءبىرى - كوميسسيا جۇمىسىنىڭ جانە شەشىم قابىلداۋدىڭ ەرەكشە اشىقتىعىن كورسەتۋ. ءبىز جەرگە قاتىستى قوعام تاراپىنان كوتەرىلگەن بارلىق ماسەلەنى دۇرىس جانە ءتيىمدى شەشە الامىز دەپ سەنەمىن»، - دەدى قازاقستان پرەزيدەنتى.
مەملەكەت باسشىسى بۇل شەشىمدەر ەڭ الدىمەن، ەل ەكونوميكاسىن دامىتۋعا جانە ازاماتتاردىڭ تۇرمىس ساپاسىن ارتتىرۋعا ارنالاتىندىعىن باسا ايتتى.
«ەڭ باستىسى، جەر شەتەلدىكتەرگە ساتىلمايتىنى تۋرالى تۇبەگەيلى شەشىم قابىلداندى»، - دەدى قاسىم-جومارت توقاەۆ.
بۇگىن قر پرەزيدەنتى ۇلتتىق قوعامدىق سەنىم كەڭەسىنىڭ 5-وتىرىسىندا شەتەلدىكتەرگە جانە شەتەلدىك زاڭدى تۇلعالارعا اۋىل شارۋاشىلىعى جەرلەرىن ساتۋعا، جالعا بەرۋگە زاڭ جۇزىندە ءبىرجولا تىيىم سالۋدى تاپسىردى. بۇل شەتەلدىكتەردىڭ ۇلەسى بار زاڭدى تۇلعالارعا دا قاتىستى.
