كازگيۋ ۋنيۆەرسيتەتى باسقارما توراعاسى تالعات نارىكباەۆ قازاقستاندىق جوو-لاردىڭ رەكتورلارىن ءبىلىم سالاسىنا الەۋمەتتىك جاۋاپكەرشىلىكپەن قاراۋعا شاقىردى. بۇل تۋرالى ول جوعارى وقۋ ورىندارىنىڭ رەكتورلارىمەن وتكەن كەزدەسۋدە ايتتى. جيىندا 120-عا جۋىق ۋنيۆەرسيتەتتىڭ باسشىسى جوعارى ءبىلىم سالاسىنداعى وزەكتى ماسەلەلەردى كوتەرىپ، ءبىلىم ساپاسىن ارتتىرۋ جولدارىن تالقىلادى.
«قۇرمەتتى ارىپتەستەر، بارشاڭىزدى ءبىلىم سالاسىنا بيزنەس ەمەس، الەۋمەتتىك جاۋاپكەرشىلىك رەتىندە قاراۋعا شاقىرامىن. ەندى بۇرىنعىداي مەملەكەتتىك ۇلگىدەگى ديپلومدار بولمايدى. سوندىقتان ارقايسىسىمىز ەل الدىندا، ستۋدەنتتەر مەن اتا-انالار الدىندا ءبىلىم ساپاسى ءۇشىن جاۋاپتىمىز. ءبىزدىڭ باستى كليەنتىمىز – ستۋدەنتتەر ەمەس، جۇمىس بەرۋشىلەر. قازىر ءبىلىم الىپ جاتقان ستۋدەنتتەر كەيىن ءبىزدىڭ جانە بالالارىمىزدىڭ بولاشاعىنا ىقپال ەتەدى»،- دەپ اتاپ ءوتتى ول رەكتورلار كەزدەسۋىندە.
تالعات نارىكباەۆتىڭ ايتۋىنشا، ەگەر ۋنيۆەرسيتەت ستۋدەنتتەن وقۋ اقىسىن الا وتىرا ەڭبەك نارىعىندا سۇرانىسقا يە ساپالى ءبىلىم بەرمەسە، ول الاياقتىق دەپ ەسەپتەلەدى.
«تۇتىنۋشى ءوزى كۇتكەندەي ساپالى ءبىلىم الا الماعان جاعداي دا كەزدەسۋى مۇمكىن. كاسىبي قۇزىرەتتىلىگىنىڭ تومەندىگىنەن جۇمىسسىز قالعان ستۋدەنتتەر نەمەسە اتا-انالارى وقۋعا جۇمسالعان اقشانى قايتارۋدى تالاپ ەتىپ، ۋنيۆەرسيتەتتى سوتقا بەرە باستاۋى دا مۇمكىن»، - دەيدى ول.
سونداي-اق تالعات نارىكباەۆ وقۋ پروتسەسى مەن بيزنەس-پروتسەستەردى تسيفرلاندىرۋ ءاردايىم اقشاعا تىرەلە بەرمەيتىنىن اتاپ ءوتتى. ۋنيۆەرسيتەتتىڭ ىشىندە قانداي پروبلەمالار بار ەكەنىن، ناتيجەلەرى قاي كەزەڭدە «توقتاپ قالاتىنىن» نەمەسە بۇرمالاناتىنىن ءتۇسىنۋ ءۇشىن ساپالى جانە تەرەڭ اۋديت جۇرگىزىپ، پروتسەستەرگە قانشا ۋاقىت جۇمسالاتىنىن انىقتاۋ قاجەت.
«ادەتتە، جوعارى وقۋ ورىندارى اشىقتىقتى قالاماعان كەزدە اكادەميالىق پروتسەستەردى تسيفرلاندىرۋعا قارسى بولادى. سەبەبى ءبىلىم ساپاسىن باعالاۋدىڭ، وتىنىشتەردى قاراۋدىڭ جانە شەشىمدەردى قابىلداۋدىڭ ءاربىر كەزەڭى كوپشىلىككە كورىنىپ تۇرادى جانە ساقتالىپ قالادى»، - دەدى تالعات نارىكباەۆ.
اتاپ وتەيىك، شارا قر ءبىلىم جانە عىلىم مينيسترلىگىنىڭ فەيسبۋكتەگى رەسمي پاراقشاسىندا تىكەلەي ەفيردە كورسەتىلدى.
«ادىرنا» ۇلتتىق پورتالى
