ەلىمىزگە بەلگىلى ءدىنتانۋشى عالىم قايرات جولدىبايۇلى سوڭعى ۋاقىتتا قوعامدا ورىن الىپ جاتقان وقيعالارعا بايلانىستى ءوزىنىڭ كوكەيىندەگى اششى شىندىقتى فەيسبۋكتەگى جەكە پاراقشاسىنا جازىپتى. ءدىنتانۋشى عالىم:
"گەربتىڭ قۇلاۋى، ەسىكتىڭ ءتۇسۋى جاي عانا كەزدەيسوقتىق ەمەس. كوزبوياشىلىقتىڭ، ساپاسىزدىقتىڭ، جەمقورلىقتىڭ ناتيجەسى. وبلىستىڭ ەڭ لاۋازىمدى تۇلعالارىنىڭ الدىندا وسىلاي قيراپ جاتسا، باسقا جاقتا نە بولىپ جاتقانىن ءبىر قۇدايدىڭ ءوزى بىلەدى. بەس بالانىڭ ءولىمى تاعدىردىڭ ءىسى دەيمىز. بىراق حالىقتى دۇرىس جۇمىسپەن قامتاماسىز ەتۋ، ولاردىڭ وقىپ-بىلۋلەرىنە بارىنشا جاعداي جاساۋ، ەلگە باعىت-باعدار بەرىپ، جان-جاقتى جەتىلدىرۋ، ساپالى ۇلت قالىپتاستىرۋ مەملەكەتتىڭ جاۋاپكەرشىلىگىندەگى دۇنيە.
جالپى وتىز جىل از ۋاقىت ەمەس. ەكونوميكا جوق. جاساندىسىنىڭ ءوزى قۇلديلاپ قۇلادى. دەموگرافيالىق ءوسىم دە، ۇلتتىق يدەولوگيا دا جوق. ءتىلىمىزدىڭ ەسىكتەن سىعالاعان سيقى اناۋ. تاۋەلسىز سوت جۇيەسى بولعان ەمەس. ساياسي دۇرىس جۇيە جاسالمادى. جۇيە ءبىر كىسىگە بايلانعان. مەملەكەتتىڭ بار بايلىعى تونالعان. جەمقورلىق بار سالانى جايلاعان.
كەدەي حالىقتىڭ سانى كۇن ساناپ ارتۋدا. قىمباتشىلىق قىسىپ بارادى. ءدىننىڭ ءوزى ساياسيلانىپ، الدەبىر مەكەمەلەردىڭ قۋىرشاعىنا اينالدى. وي ايتىپ، “قوي” دەيتىن زيالى قاۋىم جاعىمپازدىقپەن جارىسىپ، ماداق-ماراپاتتىڭ سوڭىندا ءجۇر. سوندا وتىز جىلدى قالاي اتاپ ءوتۋىمىز كەرەك ءوزى؟
مارقۇم التىنبەك سارسەنبايۇلىنىڭ: “زاۋىتتى، قالانى قارىزدانىپ بولسا دا سالۋعا بولادى. بىراق قانداي قوعام، نەندەي جۇيە قالىپتاستىردىڭ؟ جەتىستىك وسىمەن ولشەنۋى كەرەك” دەگەن ءسوزى ورىندى ايتىلعان اقيقات ءسوز!"- دەپ، ءوزىنىڭ ويىن جەتكىزگەن قايرات جولدىبايۇلى.
"ادىرنا" ۇلتتىق پورتالى
