ەمدەلۋ ءۇشىن زەينەتاقى قورىنداعى اقشانى مەرزىمىنەن بۇرىن الۋ پورتالى 25 اقپاندا ىسكە قوسىلادى، دەپ حابارلايدى "وتباسى بانكى" باسقارما توراعاسى ءلاززات يبراگيموۆا.
"سوڭعى جاڭاشىلدىقتارعا قاتىستى وزگەرىس ەنگىزۋ ءۇشىن 3 جۇمىس كۇنى قاجەت. باستاپقىدا قوسىلعان كەيبىر سىرقات تۇرلەرى الىنىپ تاستالدى. قازىر بارلىق مەحانيزمدى رەتتەپ جاتىرمىز. بۇل ءىس بىرنەشە كەزەڭنەن تۇرادى. ءوتىنىش بەرۋشى ءوز ءوتىنىشىنىڭ "وتباسى بانكى" پورتالىنان بجزق سايتىنا جىبەرىلىۋىن ەكى كۇندەي كۇتەتىن بولادى. ادەتتە بۇل ءبىر جۇمىس كۇنى ىشىندە جاسالادى. بجزق بەس كۇن ىشىندە اقشانى ارنايى ەسەپشوتقا اۋدارۋى ءتيىس", – دەدى ءلاززات يبراگيموۆا.
18 اقپانداعى جاعداي بويىنشا "وتباسى بانكىندە" 160 مىڭنان استام ارنايى ەسەپشوت اشىلعان. 96 مىڭنان استام قازاقستاندىق باسپاناعا جۇمساۋ ماقساتىندا ءوتىنىش راسىمدەگەن.
"باعدارلامانى كۇتىپ وتىرعان كوپتەگەن ادامنىڭ مەديتسينالىق كارتاسىندا دياگنوزى بار. ەرەجەگە سايكەس، ادام ءوتىنىش بەرگەن سوڭ 5 كۇن ىشىندە دارىگەرلەر كەڭەسى جينالادى. كەڭەس وتكەننەن كەيىن ەكى كۇنى ىشىندە كوميسسيا حاتشىسى كليەنتكە ناقتى جاۋاپ جەتكىزۋى ءتيىس. كوميسسيا قورىتىندىسى پورتالدا كليەنت بەرگەن ءوتىنىش جانىندا بەكىتىلەدى", – دەپ ءتۇسىندىردى بانك باسشىسى.
ەمدەلۋ ءۇشىن بىرىڭعاي جيناقتاۋشى زەينەتاقى قورىنان اقشا الۋعا ءوتىنىش بەرۋ مەحانيزمى باسپانا جاعدايىن جاقسارتۋعا بەرگەن وتىنىشپەن بىردەي بولادى.
