قازاقستاندىقتار زەينەتاقىسىن كوبەيتە الادى. بۇل تۋرالى ەڭبەك جانە حالىقتى الەۋمەتتىك قورعاۋ مينيسترلىگى بازالىق زەينەتاقىنىڭ كولەمى قالاي ەسەپتەلەتىنىن جانە ونى ارتتىرۋ جولدارىن ءتۇسىندىردى، دەپ حابارلايدى “ادىرنا” ۇلتتىق پورتالى.
زەينەتاقى جۇيەسىندەگى جىلدارعا 1998 جىلدىڭ 1 قاڭتارىنا دەيىنگى ەڭبەك ءوتىلى مەن مىندەتتى زەينەتاقى جارناسى تولەنگەن كەزەڭدەر قوسىلادى.
ماسەلەن، ەگەر زەينەتاقى جۇيەسىندەگى ءوتىل 10 جىل نەمەسە ودان از بولسا نەمەسە جۇيەدە مۇلدەم ءوتىلى بولماسا، بازالىق زەينەتاقىنىڭ كولەمى ەڭ تومەنگى كۇنكورىس دەڭگەيىنىڭ 54 پايىزىن قۇرايدى. ودان ءارى ءاربىر 10 جىلعى ءوتىلى ءۇشىن بازالىق زەينەتاقىنىڭ كولەمى 2 پايىز كوبەيىپ وتىرادى.
ەڭبەكاقى جۇيەسىنە قاتىسقان جىلدارى 20 جىل بولسا، ونداي ادامنىڭ بازالىق زەينەتاقىسى ەڭ تومەنگى كۇنكورىس دەڭگەيىنىڭ 74 پايىزىنا، 30 جىل بولسا ەڭ تومەنگى كۇنكورىس دەڭگەيىنىڭ 94 پايىزىنا تەڭ بولادى. ال ەگەر زەينەتاقى جۇيەسىندەگى جىلدارى 33 جىل نەمەسە ودان كوپ بولسا، وندا بازالىق زەينەتاقىنىڭ كولەمى ەڭ تومەنگى كۇنكورىس دەڭگەيىنىڭ 100 پايىزىنا تەڭ بولادى.
ەگەر ءبىر اي ىشىندە بىرىڭعاي جيناقتاۋشى زەينەتاقى قورىنا بىرنەشە رەت مىندەتتى زەينەتاقى جارناسىن سالسا، بۇل، ارينە، جۇيەدە ءبىر اي بولىپ ەسەپتەلەدى.
«وسىلايشا، مىندەتتى الەۋمەتتىك جارنانى بارىنشا ءجيى جانە تولىق كولەمدە سالىپ تۇرسا، زەينەتكەرلىك جاسىنا جەتكەندە بازالىق زەينەتاقى كولەمى دە كوپ بولادى»، – دەلىنگەن حابارلامادا.
ۆەدومستۆونىڭ حابارلاۋىنشا، 2022 جىلدىڭ 1 قاراشاسىنداعى جاعدايعا سايكەس، ورتاشا زەينەتاقى كولەمى بازالىق زەينەتاقىنى قوسقاندا 108 993 تەڭگە بولعان.
