اشارشىلىق تاقىرىبىنا ارنالعان دوڭگەلەك ۇستەلدە جازۋشى، تاريح عىلىمدارىنىڭ كانديداتى بەيبىت قويشىباەۆ وسىنداي پىكىر ءبىلدىردى.
«بۇل ءۇشىن ەلىمىزدەگى، كورشى ەلدەردەگى ارحيۆتەردى مۇقيات زەرتتەۋ كەرەك، جەرگىلىكتى ءباسپاسوز ماتەريالدارىن سارالاعان ءجون. بۇلارعا قوسا، حالىقتىڭ تابيعي قاسيەتىن – كەمى جەتى اتاسىن تۇگەندەي الاتىن شەجىرەشىلىگىن ەسكەرىپ، بارشا شاڭىراقتان اشارشىلىقتار سالدارىنان وپات بولعانداردىڭ سانىن اتى-جوندەرىمەن انىقتاعان ءجون»، - دەدى عالىم.
سونىمەن قاتار، بەيبىت قويشىباەۆ اشارشىلىق تاقىرىبىن تەرەڭ زەرتتەيتىن عىلىمي ورتالىق نەمەسە مۋزەي اشۋ يدەياسىن ۇسىندى.
«زۇلمات تاريحىن تەرەڭ زەرتتەپ، حالىق جادىن جاڭعىرتاتىن ارنايى ينستيتۋت پەن ۇلتتىق اپاتتى كورنەكى تۇردە كورسەتەتىن مۋزەي اشىلسا، تاۋەلسىزدىگىمىزدى باياندى ەتۋگە مۇددەلى وتانشىل، مەملەكەتشىل ۇرپاق تاربيەسىنە ولشەۋسىز زور ۇلەس قوسىلادى»، - دەدى تاريحشى.
دوڭگەلەك ۇستەلگە قاتىسقان سەنات توراعاسى ماۋلەن اشىمباەۆ مۇنداي زوبالاڭدى حالىقتىڭ، اسىرەسە، وسكەلەڭ ۇرپاقتىڭ تەرەڭ ءبىلۋى – ماڭىزدى مىندەت ەكەنىن، مۇنىڭ ءبارى تاۋەلسىزدىگىمىزدى نىعايتۋعا، تاريحي سانامىزدى جاڭعىرتۋعا جانە ازاتتىقتىڭ قادىرىن تۇسىنۋگە سەپتىگىن تيگىزەتىنىن جەتكىزدى. بۇل رەتتە تاريحشى عالىمدارىمىزدىڭ جانە زيالى قاۋىم وكىلدەرىنىڭ ەڭبەگى اسا ماڭىزدى ەكەنىن دە ەسكە سالدى.
ەلوردادا پارلامەنت سەناتىنىڭ ۇيىمداستىرۋىمەن «ازاتتىق جولىنداعى اقتاڭداقتار: اشارشىلىق زارداپتارىنا شىنايى تاريحي كوزقاراس» تاقىرىبىنا ارنالعان دوڭگەلەك ۇستەل ءوتتى.
ونىڭ قورىتىندىسى بويىنشا مينيسترلىكتەرگە بىرقاتار ۇسىنىمدار جولداندى. ولاردىڭ قاتارىندا عالىمداردىڭ ەلىمىز بەن شەت ەلدەردەگى ارحيۆتەرگە قول جەتكىزۋىن قامتاماسىز ەتۋ، قۇپيا ارحيۆ قۇجاتتارىن اشۋ، اشارشىلىق قۇرباندارىنىڭ تسيفرلى مالىمەتتەر بازاسىن قۇرۋ، جىل سايىن 31 مامىردا «1 مينۋت ۇنسىزدىك» جاريالاۋ، «ازا سارايى» اتتى مەموريالدى كەشەن سالۋ سياقتى ۇسىنىستار قامتىلعان.
