Asharshylyq taqyrybyna arnalǵan dóńgelek ústelde jazýshy, tarıh ǵylymdarynyń kandıdaty Beıbit Qoıshybaev osyndaı pikir bildirdi.
«Bul úshin elimizdegi, kórshi elderdegi arhıvterdi muqııat zertteý kerek, jergilikti baspasóz materıaldaryn saralaǵan jón. Bularǵa qosa, halyqtyń tabıǵı qasıetin – kemi jeti atasyn túgendeı alatyn shejireshiligin eskerip, barsha shańyraqtan asharshylyqtar saldarynan opat bolǵandardyń sanyn aty-jónderimen anyqtaǵan jón», - dedi ǵalym.
Sonymen qatar, Beıbit Qoıshybaev asharshylyq taqyrybyn tereń zertteıtin ǵylymı ortalyq nemese mýzeı ashý ıdeıasyn usyndy.
«Zulmat tarıhyn tereń zerttep, halyq jadyn jańǵyrtatyn arnaıy Instıtýt pen Ulttyq apatty kórneki túrde kórsetetin Mýzeı ashylsa, táýelsizdigimizdi baıandy etýge múddeli otanshyl, memleketshil urpaq tárbıesine ólsheýsiz zor úles qosylady», - dedi tarıhshy.
Dóńgelek ústelge qatysqan Senat Tóraǵasy Máýlen Áshimbaev mundaı zobalańdy halyqtyń, ásirese, óskeleń urpaqtyń tereń bilýi – mańyzdy mindet ekenin, munyń bári Táýelsizdigimizdi nyǵaıtýǵa, tarıhı sanamyzdy jańǵyrtýǵa jáne azattyqtyń qadirin túsinýge septigin tıgizetinin jetkizdi. Bul rette tarıhshy ǵalymdarymyzdyń jáne zııaly qaýym ókilderiniń eńbegi asa mańyzdy ekenin de eske saldy.
Elordada Parlament Senatynyń uıymdastyrýymen «Azattyq jolyndaǵy aqtańdaqtar: AShARShYLYQ zardaptaryna shynaıy tarıhı kózqaras» taqyrybyna arnalǵan dóńgelek ústel ótti.
Onyń qorytyndysy boıynsha mınıstrlikterge birqatar usynymdar joldandy. Olardyń qatarynda ǵalymdardyń elimiz ben shet elderdegi arhıvterge qol jetkizýin qamtamasyz etý, qupııa arhıv qujattaryn ashý, Asharshylyq qurbandarynyń ıfrly málimetter bazasyn qurý, jyl saıyn 31 mamyrda «1 mınýt únsizdik» jarııalaý, «Aza saraıy» atty memorıaldy keshen salý sııaqty usynystar qamtylǵan.
