باتىس قازاقستان وبلىسىندا وقۋشىلار مەن مۇعالىمدەر اراسىندا كوروناۆيرۋس جۇقتىرۋ سانى كوبەيدى، دەپ حابارلايدى "ادىرنا" ۇلتتىق پورتالى قازاقپاراتقا سىلتەمە جاساپ.
بقو سانيتارلىق-ەپيدەميولوگيالىق باقىلاۋ دەپارتامەنتىنىڭ باسشىسى مۇحامعالي ارىسپاەۆتىڭ ءمالىم ەتكەنىندەي، سوڭعى اپتادا 42 وقۋشى، 16 مۇعالىمنەن ىندەت تابىلدى. ونىڭ سوزىنە قاراعاندا، وقۋ جىلى باستالعاننان بەرى 365 وقۋشى اۋىرسا، سونىڭ 173-ءى ءداستۇرلى تۇردە، 192-ءسى قاشىقتان ءبىلىم العان. ال ءۇشىنشى توقساندا 11 قاڭتاردان باستاپ سىرقاتتانعان 151 شاكىرتتىڭ 75-ءى ءداستۇرلى تۇردە، 76-سى قاشىقتان وقيدى.
قالا مەن اۋدانداردىڭ باس مەملەكەتتىك سانيتار دارىگەرلەرىنىڭ قاۋلىسىنا سايكەس 31 مەكتەپتە 45 سىنىپ كارانتينگە جابىلدى. سونداي-اق، ءتورت مەكتەپ تولىقتاي جابىلعان.
«ءبىز 8 اقپاننان باستاپ قاۋلىعا وزگەرىستەر ەنگىزدىك. بۇرىن ىندەت شىققان سىنىپ قانا كارانتينگە جابىلاتىن. بۇدان بىلاي ءبىر وقۋشى نەمەسە مۇعالىمنەن كوروناۆيرۋس انىقتالعان جاعدايدا سول مەكتەپ تۇگەلدەي ينكۋباتسيالىق كەزەڭ اياقتالعانعا دەيىن، ياعني 14 كۇنگە كارانتينگە جابىلادى»، - دەدى ءوڭىردىڭ باس مەملەكەتتىك سانيتار دارىگەرى م.ارىسپاەۆ.
وبلىستا 1 قاڭتاردان بەرى 2 480 ادام اۋىرسا، سونىڭ 1837-ءسى قاڭتاردا، 643-ءى اقپاندا تىركەلگەن. سوڭعى اپتادا اۋرۋشاڭدىق دەڭگەيى 5,6 پايىزعا تومەندەگەنىمەن، احۋال ءالى دە تۇراقسىز بولىپ وتىر. اقپان ايىندا كوروناۆيرۋس جۇقتىرعانداردىڭ 202-ءسى نەمەسە 31,4 پايىزى – جۇمىس ىستەيتىن ادامدار، 177-ءسى (27,5 پايىزى) – زەينەتكەرلەر، 144-ءى (22,3 پايىزى) – جۇمىسسىزدار، 42-ءسى (6,5 پايىزى) – وقۋشىلار، 24-ءى (3,7 پايىزى) – مەديتسينا قىزمەتكەرلەر.
ىندەت جۇقتىرعاندار اراسىندا مەملەكەتتىك قىزمەتشىلەر دە بار. ايتالىق، وبلىستىق قۇرىلىس باسقارماسىندا وسىنداي جاعداي تىركەلدى. «ورال قالاسى، سونىمەن قاتار بايتەرەك، ءبورلى، اقجايىق، تاسقالا جانە شىڭعىرلاۋ اۋداندارى ءالى دە «قىزىل» ايماقتا تۇر. سوندىقتان كارانتين تالاپتارىن قاتاڭ ساقتاۋ كەرەكتىگىن ۇمىتۋعا بولمايدى»، - دەدى دەپارتامەنت باسشىسى.
