رەسەيدە كەيبىر جانارماي قۇيۋ بەكەتتەرىندە بەنزين تاپشىلىعى قاتتى بايقالىپ وتىر، دەپ حابارلايدى “ادىرنا” ۇلتتىق پورتالى.
Reuters اگەنتتىگىنىڭ حابارلاۋىنشا، رەسەيدە كەيبىر ماركالى جانارماي جەتىسپەي جاتىر. ترەيدەرلەر مەن بولشەك ساۋدا وكىلدەرىنىڭ ايتۋىنشا، ۋكراين دروندارىنىڭ مۇناي وڭدەۋ زاۋىتتارى مەن ەكسپورتتىق تەرمينالدارعا جاساعان شابۋىلدارى مۇناي وڭدەۋدى ازايتىپ، ال جوعارى كرەديتتىك مولشەرلەمەلەر جەكە ستانتسيالارعا قور جيناۋعا مۇمكىندىك بەرمەي وتىر.
ۋكراينا رەسەيدىڭ ەنەرگەتيكالىق ينفراقۇرىلىمىنا سوققىلاردى كۇشەيتتى.
بۇل – ماسكەۋدىڭ ەكسپورتتىق تابىسىن تومەندەتۋ، ەل ىشىندە نارازىلىق تۋعىزۋ جانە كرەملدى بەيبىت كەلىسسوزدەرگە يتەرمەلەۋ ماقساتىندا جاسالۋدا.
اتالعان شابۋىلدار كەي كۇندەرى رەسەيدەگى مۇناي وڭدەۋدى بەستەن ءبىر بولىگىنە دەيىن ازايتىپ، نەگىزگى پورتتارداعى ەكسپورت كولەمىن تومەندەتتى. ديزەل قورى جەتكىلىكتى بولعانىمەن، بەنزين ءوندىرىسى ىشكى سۇرانىسپەن شامالاس، سوندىقتان وڭدەۋ كولەمىنىڭ ازايۋى تاپشىلىققا اكەلۋى مۇمكىن.
قازىر بەكەتتەردە ۇزىن-سونار كەزەك بايقالمايدى. الايدا Ai-92 جانە Ai-95 سەكىلدى تانىمال ماركالار ءجيى قولجەتىمسىز بولىپ قالىپ جاتىر.
بەنزين تاپشىلىعى العاش رەت تامىز ايىندا قيىر شىعىس پەن قىرىمدا پايدا بولدى. كەيىن مۇنداي قيىندىقتار ەدىل-ۆياتكا ايماعىندا، رەسەيدىڭ وڭتۇستىگى مەن ورتالىق بولىگىندە تىركەلدى.
