Sauda jäne integrasiia ministrlıgınıŋ alqa otyrysynda vise-ministr Janel Küşıkova EAEO aiasynda keibır memleketter Qazaqstan aldyndaǧy mındettemelerın oryndamai otyrǧanyn mälımdedı. Būl turaly QazAqparatqa sılteme jasap, "Adyrna" ūlttyq portaly habarlaidy.
«Euraziialyq ekonomikalyq odaqtyŋ ortaq naryǧynyŋ äleuetın tolyqqandy jüzege asyruǧa jekelegen faktorlar kedergı keltırıp tūr. Bırınşıden, özara saudaǧa qoiylǧan kedergıler bar. Otandyq tauarlardyŋ eksporty eŋ aldymen Resei naryǧyna baǧyttalǧan. Sonymen bırge reseilık naryqtaǧy qazaqstandyq biznestıŋ jandanuy - serıktesterdıŋ şekteu şaralaryn engızuıne sebep bolyp otyr. Bügıngı künı däleldengen 63 kedergınıŋ 54-ı joiyldy, onyŋ 25-ı reseilık taraptan qoiylǧan. Onyŋ özınde būl tızım tolyq emes», - dedı Janel Küşıkova Sauda jäne integrasiia ministrlıgınıŋ alqa otyrysynda.
Onyŋ aituynşa, Ükımet osy kedergılerdıŋ bärın anyqtap, EEK alaŋynda olardyŋ küşın joiu üşın qajettı şaralardy qabyldauda.
«Mäselen, ötken jyly qazaqstandyq biznes üşın eŋ jandy degen 8 kedergınıŋ küşı joiyldy. Olardyŋ jalpy somasy 100 million dollardy qūraidy. Biznespen kerı bailanysty jolǧa qoiu üşın Qoǧamdyq qabyldau qyzmetı qūryldy. Bızdıŋ biznestıŋ jūmysyna kedergı keltıretın taǧy 8 kedergını alyp tastau kerek», - dedı ol.
Janel Küşıkova sonymen qatar ekonomikalyq odaqta serıktes memleketterdıŋ keibırı özıne alǧan mındettemelerdı oryndamai jatqanyn atap öttı.
«EAEO turaly Kelısımnıŋ negızgı erejelerı josparlanǧan uaqyttan qalyp barady. Tıptı jekelegen erejeler mülde şet qalǧan. Keibır kelısımderdıŋ küşıne enu merzımı ūzaryp kettı. Memlekettık satyp alu salasyndaǧy ūlttyq rejim tolyǧymen oryndalmaidy. EAEO-daǧy belgılı serıktester aimaqtyq sertifikattau türınde qosymşa talaptardy belgılep qoiǧan. Bank kepıldıkterı men ESQ-ny tanu tärtıbı mülde joq. EAEO-ǧa müşe memleketterdıŋ ışkı şekaralarynda baqylaudyŋ barlyq türınıŋ joiylǧanyna qaramastan, ıs jüzınde baqylaudyŋ jaŋa türlerı paida bola bastady. Osylaişa, Resei Federasiiasynda veterinariialyq-sanitarlyq baqylau degen şyqty. Al federaldy keden qyzmetınıŋ mobildı toptary ıs jüzınde kedendık baqylaudy jüzege asyrady. EAEO-nyŋ aqparattyq integrasiialanǧan jüiesı jūmys ısteuden qaldy. Juyq arada osy mäselelerdı köteremız», - dedı ol.
Janel Küşıkova üşınşıden ekonomikalyq odaqqa müşe memlekettermen kooperasiia deŋgeiı mülde tömen ekenın alǧa tartty.
«Ökınışke qarai, EAEO-ǧa müşe memleketter bır-bırıne teŋ serıktes emes, bäsekeles retınde qaraidy. Osy baǧyttaǧy jūmysty küşeitu qajettıgın Premer-Ministr 5 aqpandaǧy Euraziialyq ükımetaralyq keŋestıŋ otyrysy barysynda da atap öttı. Üşınşı eldermen sauda kelısımderınıŋ äleuetın barynşa arttyruǧa mümkındık beretın yntymaqtastyqty jolǧa qoiu kerek dep sanaimyz», - dedı ol.
Ūqsas jaŋalyqtar
