ماڭعىستاۋ اۋدانىنا قاراستى ۇشتاعان اۋىلىندا ەگىزدەر ومىرگە كوپ كەلەدى. ەكى مىڭعا جۋىق تۇرعىنى بار اۋىلدا 30 ەگىز جۇپ بار. ولاردىڭ ۇلكەنى 40 جاستا، كىشىسى 4 ايلىق سابيلەر. اۋىلدا جىل سايىن كەمىندە ءبىر ەگىز دۇنيەگە كەلەدى ەكەن. دەموگرافيالىق ءوسىمىن جەرگىلىكتى تۇرعىندار تاڭعاجايىپ قۇبىلىسقا بالاپ وتىر. بۇل تۋرالى ماڭعىستاۋ اۋدانى اكىمدىگىنىڭ ءباسپاسوز قىزمەتى جازدى، دەپ حابارلايدى «ادىرنا» ءتىلشىسى.
بۇل اۋىلدا «ەگىزدەر» دەپ اتالىپ كەتكەن ەرەكشە كوشە دە بار. مۇنداعى 7 ۇيدە دە ەگىزدەر تۇرادى. سونداي-اق قوس ەگىز ۇل-قىزدى تاربيەلەپ وتىرعان نازاروۆتار وتباسى دا وسى اۋىلدىڭ تۋمالارى. انالارىنىڭ ايتۋىنشا بەت-الپەتىندە ەشقانداي ايىرماشىلىق بولماعانىمەن مىنەز-قۇلىقتارى ەكى ءتۇرلى.
«ءبىز مۇنى ء"تاڭىردىڭ سىيى" دەپ سانايمىز. ەگىز قىزىمىزدان سوڭ اراعا ءتورت جىل سالىپ تاعى ەگىز ۇلىمىز دۇنيەگە كەلدى . كەۋدەمىزدى ارقاشان قۋانىش كەرنەپ تۇرادى. سوزبەن ايتىپ جەتكىزۋ قيىن، شۇكىرشىلىك ەتەمىز»،-دەيدى ۇشتاعان اۋىلىنىڭ تۇرعىنى ايدوس نازاروۆ.
راسىمەن دە، ءبىر اۋىلدا ەگىزدەردىڭ كوپتەپ دۇنيەگە كەلۋى سيرەك قۇبىلىس. ماسەلەن، 1981 جىلدان قازىرگى ۋاقىتقا دەيىن بىرنەشە ەگىز دۇنيەگە ەسىگىن اشقان.
اۋىلداعى ەڭ كىشكەنتاي ەگىز سابيلەر قازىر 4 ايلىق. ال، 2017 جىلى ەگىز ۇل مەن قىزدى دۇنيەگە اكەلگەن تۇرعىننىڭ ايتۋىنشا سول جىلى پەرزەنتحانادا بىرنەشە ەگىز بالا تۋعان. ماماندار «بۇل قۇبىلىس ءالى تولىق زەرتتەلمەگەنىمەن گەنەتيكالىق تۇرعىدا بىرنەشە فاكتور اسەر ەتۋى مۇمكىن»،-دەيدى.
ماڭعىستاۋ اۋدانىنا قاراستى بۇل اۋىل عانا ەمەس، الەمدە ۇشتاعان سىندى ەرەكشە ەلدى-مەكەندەر بار ەكەن.
«ادىرنا» ۇلتتىق پورتالى
