كەيكى باتىردىڭ سۇيەگى 12 جەلتوقاندا جەتكىزىلەدى

2115
Adyrna.kz Telegram

كەيكى باتىردى جەرلەۋ شارالارى الداعى جىلدىڭ قىركۇيەگىنە بەلگىلەنىپ وتىر دەپ حابارلايدى "ادىرنا"  "قازاقپارات" اگەنتتىگىنە سىلتەمە جاساپ. بۇل تۋرالى بۇگىن قر مادەنيەت جانە سپورت مينيستر ارىستانبەك مۇحامەديۇلى ءمالىم ەتتى.

«12 جەلتوقساندا بىزگە بۋداپەشتتەن كەيكى باتىردىڭ بەت الپەتىنىڭ ءمۇسىنىن الىپ كەلەدى. قازىرگى كەزدە الدىن الا سۋرەتتەر جىبەرىلدى. باتىردىڭ وزىندىك ەرەكشەلىكتەرى بار ەكەنىن بىلەسىزدەر. ۇكىمەت باسشىسىنىڭ ورىنباسارى باسشىلىق ەتىپ وتىرعان مەملەكەتتىك كوميسسيانىڭ وتىرىسى ءوتىپ، وندا اقىلعا سالىنعان ءتيىستى شەشىم قابىلداندى. وعان قۇرمەتتى تۇلعالار قاتىستى. اتاپ ايتقاندا، بارلىق شارالاردى قىركۇيەكتە وتكىزۋ ورىندى بولاتىندىعى كەلىسىلدى. ءبىز اتالعان مەرزىمگە دەيىن كەيكى باتىرعا مونۋمەنت سالۋىمىز كەرەك. ويتكەنى، قازىرگى كەزدە تۇرعان ەسكەرتىكشتىڭ بيىكتىگى ەكى مەتر عانا ەكەن»،-دەپ توقتالدى مينيستر جالپى وتىرىستان كەيىن تىلشىلەر ساۋالىنا جاۋاپ بەرۋ كەزىندە.

سونىمەن قاتار دنق-نى سوڭىنا دەيىن انىقتاۋ مىندەتى تۇرعانىنا توقتالعان ول، ماجارلىق عالىمدار ءتيىستى زەرتتەۋلەر جۇرگىزىپ جاتقانىن جەتكىزدى. «ەگەر اسىعىس تۇردە جەرلەي سالساق، كۇدىك تۋعىزىپ وتىرعان ماسەلەلەر جابىلۋ كۇيىندە قالار ەدى. جالپى جەرلەۋ شارالارى قىركۇيەكتە وتەدى»،-دەدى ا. مۇحامەديۇلى.

ەسكە سالا كەتەيىك، 13 قازان كۇنى قازاقستان رەسپۋبليكاسى ەلشىلىگىنىڭ كومەگىمەن قازاقستان رەسپۋبليكاسىنىڭ ورتالىق مەملەكەتتىك مۋزەيى بۋداپەشت قالاسىنا كەيكى باتىردىڭ باس سۇيەگىن جەتكىزگەن بولاتىن. ۆەنگريانىڭ جاراتىلىستانۋ عىلىمدارى مۋزەيىندە قازاقستان رەسپۋبليكاسىنىڭ ورتالىق مەملەكەتتىك مۋزەيىنىڭ ديرەكتورى نۇرسان ءالىمباي ۆەنگريا مۋزەيىنىڭ باس ديرەكتورى زولتان كورشوشقا دنق ساراپتاماسىن جۇرگىزىپ، قالپىنا كەلتىرۋ ءۇشىن كەيكى باتىردىڭ باس سۇيەگىن تاپسىردى. مۋزەيدىڭ انتروپولوگيالىق بولىمىنە جەتەكشىلىك ەتەتىن اگنەش كۋشتار كەيكى باتىردىڭ باس سۇيەگىن قالپىنا كەلتىرۋ جۇمىستارىن ءوز باسشىلىعىنا الدى.

مۇنىمەن قوسا، قوستاناي وبلىسىنىڭ اكىمدىگى كەيكى باتىردىڭ دەنە سۇيەكتەرىن جەرلەۋگە دايىندىق جونىنەن ۇيىمداستىرۋشىلىق جۇمىسىن جۇرگىزىپ جاتقاندىعى حابارلانعان ەدى.

بۇدان بۇرىن حابارلانعانداي، 6 قازان كۇنى كەيكى باتىردىڭ باس سۇيەگى رەسەيدەن قازاقستانعا جەتكىزىلدى. ول 93 جىل بويى سانكت-پەتەربۋرگ قالاسىنداعى كۋنستكامەرادا ساقتالىپ كەلدى.


"ادىرنا"

پىكىرلەر