Keıki batyrdy jerleý sharalary aldaǵy jyldyń qyrkúıegine belgilenip otyr dep habarlaıdy "ADYRNA" "QazAqparat" Agenttigine silteme jasap. Bul týraly búgin QR Mádenıet jáne sport mınıstr Arystanbek Muhamedıuly málim etti.
«12 jeltoqsanda bizge Býdapeshtten Keıki batyrdyń bet álpetiniń músinin alyp keledi. Qazirgi kezde aldyn ala sýretter jiberildi. Batyrdyń ózindik erekshelikteri bar ekenin bilesizder. Úkimet basshysynyń orynbasary basshylyq etip otyrǵan memlekettik komıssııanyń otyrysy ótip, onda aqylǵa salynǵan tıisti sheshim qabyldandy. Oǵan qurmetti tulǵalar qatysty. Atap aıtqanda, barlyq sharalardy qyrkúıekte ótkizý oryndy bolatyndyǵy kelisildi. Biz atalǵan merzimge deıin Keıki batyrǵa monýment salýymyz kerek. Óıtkeni, qazirgi kezde turǵan eskertikshtiń bıiktigi eki metr ǵana eken»,-dep toqtaldy mınıstr jalpy otyrystan keıin tilshiler saýalyna jaýap berý kezinde.
Sonymen qatar DNQ-ny sońyna deıin anyqtaý mindeti turǵanyna toqtalǵan ol, majarlyq ǵalymdar tıisti zertteýler júrgizip jatqanyn jetkizdi. «Eger asyǵys túrde jerleı salsaq, kúdik týǵyzyp otyrǵan máseleler jabylý kúıinde qalar edi. Jalpy jerleý sharalary qyrkúıekte ótedi»,-dedi A. Muhamedıuly.
Eske sala keteıik, 13 qazan kúni Qazaqstan Respýblıkasy elshiliginiń kómegimen Qazaqstan Respýblıkasynyń Ortalyq memlekettik mýzeıi Býdapesht qalasyna Keıki batyrdyń bas súıegin jetkizgen bolatyn. Vengrııanyń jaratylystaný ǵylymdary mýzeıinde Qazaqstan Respýblıkasynyń Ortalyq memlekettik mýzeıiniń dırektory Nursan Álimbaı Vengrııa mýzeıiniń bas dırektory Zoltan Korshoshqa DNQ saraptamasyn júrgizip, qalpyna keltirý úshin Keıki batyrdyń bas súıegin tapsyrdy. Mýzeıdiń antropologııalyq bólimine jetekshilik etetin Agnesh Kýshtar Keıki batyrdyń bas súıegin qalpyna keltirý jumystaryn óz basshylyǵyna aldy.
Munymen qosa, Qostanaı oblysynyń ákimdigi Keıki batyrdyń dene súıekterin jerleýge daıyndyq jóninen uıymdastyrýshylyq jumysyn júrgizip jatqandyǵy habarlanǵan edi.
Budan buryn habarlanǵandaı, 6 qazan kúni Keıki batyrdyń bas súıegi Reseıden Qazaqstanǵa jetkizildi. Ol 93 jyl boıy Sankt-Peterbýrg qalasyndaǵy Kýnstkamerada saqtalyp keldi.
"ADYRNA"
