نۇر-سۇلتاندا دەنساۋلىق ساقتاۋ مينيسترلىگىنىڭ الدىندا نارازىلىق اكتسياسى ءوتىپ جاتىر. ءتۇرلى ءتۇستى كيىنگەن ايەلدەر ۆاكتسينالاۋ مەن ادامداردى تۇستەرگە بولەتىن QR-كودتىڭ ەنگىزىلۋىنە قارسى، دەپ حابارلايدى "ادىرنا" ۇلتتىق پورتالى Sputnik قازاقستان سايتىنا سىلتەمە جاساپ.
قولدارىنا كاسترول ۇستاعان انالار دەنساۋلىق ساقتاۋ ءمينيسترى الەكسەي تسويدىڭ شىققانىن تالاپ ەتىپ وتىر. ولار ادامداردى كوروناۆيرۋسقا بايلانىستى ءتۇرلى تۇستەرگە بولەتىن QR-كودتىڭ ەنگىزىلۋىنە قارسى ەكەنىن ايتىپ شۋلاۋدا.
"مەن ءوزىمدى تۇسكە بولگەنىن قالامايمىن. ەرتەڭ سوندا مەن "قىزىل" ايماق بولىپ جۇرەمىن بە؟ ۇلىم ۇيلەنگىسى كەلسە، "جاسىلدان" قىز الىپ جاتىرمىز دەپ وتىرامىز با؟ ۆاكتسيناتسياعا دا قارسىمىن، ءوز بالالارىما ۆاكتسينا سالدىرتپايمىن. ءماجبۇرلى ەمەس دەۋدىڭ استارىندا وسىنداي جاتىر. ەرتەڭ قىزىل تۇستەگىلەردى ەشقايدا كىرگىزبەيدى، بالالارىم مەكتەپكە بارا المايدى. مەن تەك دۇكەنگە، دارىحاناعا عانا كىرە الامىن", - دەيدى بەلسەندى بايان ميراس.
نارازى توپقا تسيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگىنىڭ ءباسپاسوز حاتشىسى ماقسات تولەگەنوۆ كەلىپ، QR-كودى بار قوسىمشانىڭ قالاي جۇمىس ىستەيتىنىن ءتۇسىندىردى.
ايتۋىنشا، قوسىمشا مىندەتتى ەمەس جانە بيزنەس وكىلدەرىنە ارنالعان.
"بۇل قوسىمشانىڭ ۆاكتسيناعا ەش قاتىسى جوق. قوسىمشا شەكتەۋ شارالارى كەزىندە بيزنەسكە قىزمەتىن جالعاستىرۋعا مۇمكىندىك بەرەدى. قازىر سيمتومپسىز اۋىرىپ جۇرگەن ادامدار بار. قوسىمشانىڭ كومەگىممەن مەكەمە قوجايىندارى ادامداردىڭ مارتەبەسىن انىقتاپ، پتر-تەست وڭ بولسا، ونى مەكەمەگە كىرگىزبەي، بىردەن وقشاۋلايدى", - دەدى ول.
جۋىردا تسيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگى قازاقستاندىقتار كوروناۆيرۋسقا بايلانىستى قىزىل، سارى، كوك جانە جاسىل تۇستەرگە ء"بولىنىپ", كەيبىر مەكەمەلەرگە QR-كود ارقىلى كىرگىزىلەتىنىن حابارلادى. پيلوتتىق جوبا ازىرگە Spa, فيتنەس ورتالىق، كينوتەاتر سياقتى مەكەمەلەردە قولدانىلۋدا. ەندى وسى ورىندارعا بارۋ ءۇشىن ارنايى QR-كودتى سكانەرلەپ، كىرەبەرىستە كورسەتۋ قاجەت. ال باعدارلاما قىزىل، سارى، كوك جانە جاسىل تۇستەرمەن تاۋەكەل دارەجەسىن كورسەتەدى.
قىزىل ءتۇس قوزعالىستى شەكتەۋدى، امبۋلاتورلىق باقىلاۋداعى ادامدار ءۇشىن ۇيدە وقشاۋلانۋدىڭ قاتاڭ رەجيمىن ساقتاۋدى بىلدىرەدى.
سارى – قوزعالىستى ءىشىنارا شەكتەۋ – پايدالانۋشى پتر دەرەكتەر بازاسىندا ناۋقاسپەن بايلانىستا بولعان ادام رەتىندە كورسەتىلگەن: پاتسيەنتكە تۇراتىن جەرىنەن 500 مەتردەن اسپايتىن ازىق-تۇلىك جانە شارۋاشىلىق دۇكەندەرگە، دارىحانالارعا بارۋعا عانا رۇقسات ەتىلەدى.
كوك ءتۇس شىقسا، پتر-تەست مىندەتتى سانالاتىن ورىنداردى قوسپاعاندا (مىسالى، اۋەجايدا), ءجۇرىپ-تۇرۋعا ەشقانداي شەكتەۋ جوق دەگەن ءسوز.
جاسىل مارتەبە قوزعالىستا ەشقانداي شەكتەۋ جوق ەكەنىن بىلدىرەدى. بۇل پايدالانۋشى دەرەكتەر بازاسىندا پتر-تەستىلەۋدەن وتكەن، COVID-19 تەرىس ناتيجەسى بار ادام رەتىندە كورسەتىلگەن.
