ءۇش مىڭ ەرىكتىگە وتاندىق QazCovid-in ۆاكتسيناسى ەگىلدى. بۇل تۋرالى بۇگىن وكق وتكەن ءباسپاسوز ءماسليحاتىندا دەنساۋلىق ساقتاۋ ءبىرىنشى ۆيتسە-ءمينيسترى مارات شورانوۆ ايتتى، دەپ حابارلايدى «ادىرنا» ءتىلشىسى قازاقپاراتقا سىلتەمە جاساپ.
«11 قاڭتار كۇنى ەرىكتىلەردى ىرىكتەۋ اياقتالىپ، 3000 ادامعا ەگىلدى. قازىرگى ۋاقىتتا زەرتتەۋگە قاتىسۋشىلارعا ديناميكالىق باقىلاۋ جۇرگىزىلۋدە. ۆاكتسيناتسيادان قورعانىس اسەرى ءبىرىنشى دوزانى ەنگىزگەننەن كەيىن 12 كۇننەن كەيىن بىلىنە باستايدى، بىراق تولىق قورعاۋدى قامتاماسىز ەتۋ ءۇشىن ەكى دوزا قاجەت، ولاردى 19 كۇننەن 23 كۇنگە دەيىنگى ارالىقپەن ەنگىزۋ ۇسىنىلادى. ۆاكتسينا ورگانيزمنىڭ يممۋندىق رەاكتسياسىن تۋدىرادى»، - دەدى مارات شورانوۆ وكق-دا وتكەن ءباسپاسوز ءماسليحاتىندا.
وسىدان كەيىن يممۋندىق جۇيە ۆيرۋستى تانىپ، انتيدەنەلەر پايدا بولا باستايدى. اۋرۋمەن كۇرەسۋ ءۇشىن پايدا بولاتىن اقۋىزدار، ۆيرۋستى ەستە ساقتاپ، ەگەر ۆيرۋس قايتادان دەنەگە ەنسە، وندا يممۋندىق جۇيە دەرەۋ ارەكەت ەتىپ، ونى جويادى. ونىڭ كوبەيۋىنە جانە اۋرۋدىڭ تۋدىرۋىنا جول بەرمەيدى.
«ادىرنا» ۇلتتىق پورتالى
