دەنساۋلىق ساقتاۋ ءمينيسترى الەكسەي تسوي ەلدە ءدارى-دارمەك جەتىسپەۋشىلىگى بولمايتىنىن مالىمدەدى، دەپ حابارلايدى «ادىرنا» ۇلتتىق پورتالى قازاقپارات ءتىلشىسىنە سىلتەمە جاساپ.
ۇكىمەتتىڭ كەڭەيتىلگەن وتىرىسىندا مەملەكەت باسشىسى الەكسەي تسويعا ءدارى-دارمەك باعاسى قالاي قاداعالانىپ جاتقانىن سۇرادى. «مەنىڭ بىلۋىمشە بۇل تۇرعىدا ماسەلە ءالى دە بار سەكىلدى. بۇل باعىتتا قانداي جۇمىس جۇرگىزىپ جاتىرسىزدار؟» - دەپ سۇرادى پرەزيدەنت الەكسەي تسويدان. بۇل سۇراققا جاۋاپ بەرگەن مينيستر ءدارى-دارمەكتىڭ شەكتى باعاسىن قاداعالاۋ ماسەلەسى قايتا قارالعانىن ءمالىم ەتتى. «قازىرگى ۋاقىتتا كوروناۆيرۋس پرەپاراتتارى بويىنشا ماركەتينگتى شىعىنداردىڭ ءبارىن الىپ تاستادىق. ءدارىحانالاردا جەتىسپەۋشىلىك بولماس ءۇشىن ءبىز كوروناۆيرۋسقا شالدىققان ادامدارعا امبۋلاتوريالىق ءدارى-دارمەكتى تەگىن قىلدىق. بۇل دا دارىحانالارداعى كەزەكتى جويدى. وسىلايشا ءبىز انتيكوۆيد پرەپاراتتاردىڭ باعاسىن ورتا ەسەپپەن 27 پايىزعا ارزانداتتىق. سونىمەن قاتار بيىل «حالىق دەنساۋلىعى» كودەكسىنە ءتيىستى وزگەرىستەردى ەنگىزىپ، بولشەكتىك سەگمەنتتەگى باعالاردى قاداعالاۋ تەتىگىن الىپ تاستاماقپىز. وسىلايشا، ءبىز بولشەكتىك سەگمەنتتەگى باعانى تومەندەتەرلىك قوسىمشا تەتىكتەرگە يە بولامىز»، - دەدى ول. «ياعني ءدارى-دارمەك جەتىسپەۋشىلىگى بولمايدى عوي؟» دەپ سۇراعىن قايتالادى پرەزيدەنت. بۇل سۇراققا الەكسەي تسوي «ءيا» دەپ جاۋاپ بەردى.
