دەنساۋلىق ساقتاۋ مينيسترلىگى كوروناۆيرۋسقا قارسى ۆاكتسينا سالدىرعان قازاقستاندىق قايتىس بولدى دەگەن حابارلاماعا پىكىر ءبىلدىردى، - دەپ حابارلايدى «ادىرنا» ۇلتتىق پورتالى Tengrinews.kz تىلشىسىنە سىلتەمە جاساپ.
جەلىدە تاراپ جاتقان حابارلامادا ماڭعىستاۋ وبلىسى مۇنايلى اۋدانى باتىر اۋىلىنىڭ تۇرعىنى ۆاكتسينا سالدىرىپ، كەيىن قايتىس بولعانى ايتىلادى.
"اسقار توڭگەۇلى باۋىرىمىز ۆاكتسينا سالعاننان قايتىس بولىپتى! ۆاحتاعا كەتەر الدىندا كۆي تەستەن ءوتىپ جانە ۆاكتسينا سالدىرعان كوپ ۇزاماي قايتىس بولعان. اسقار باۋىرىمىزدىڭ تۋعاندارىنا قايعىرىپ كوڭىل ايتامىن!", - دەلىنگەن حابارلامادا.
سانيتارلىق-ەپيدەميولوگيالىق باقىلاۋ كوميتەتىنىڭ رەسمي وكىلى ەرجان بايتاناەۆ وسى حابارلاماعا پىكىر ءبىلدىردى.
"بيىل 19 قاڭتاردا 1978 جىلعى ەر ادامنىڭ قان قىسىمى جوعارىلاپ، سالدارىنان قايتىس بولعان. ول ەشقانداي ۆاكتسيناتسيا العان جوق", - دەدى ول.
بايتاناەۆ بۇگىنگى تاڭدا كوروناۆيرۋس ينفەكتسياسىنا قارسى ۆاكتسينا ماڭعىستاۋ وبلىسىنا اكەلىنبەگەنىن اتاپ ءوتتى. ۆاكتسينانىڭ ءبىرىنشى پارتياسىن ايماققا جەتكىزۋ 28-29 قاڭتارعا جوسپارلانعان ەكەن.
