بۇگىن اقتاۋداعى انا مەن بالا ورتالىعىنىڭ ۇجىمى تورتەم مەن ونىڭ اناسىن سالتاناتتى تۇردە ۇيلەرىنە شىعارىپ سالدى، دەپ حابارلايدى «ادىرنا» ءتىلشىسى ماڭعىستاۋ وبلىسىنىڭ قوعامدىق كوممۋنيكاتسيا ورتالىعىنا سىلتەمە جاساپ.
اقتاۋ قالاسىنىڭ تۇرعىنى ساميرا گاسانوۆا 2020 جىلدىڭ 15-ءشى جەلتوقسان كۇنى بوسانعان بولاتىن. جۇكتىلىك كەزەڭى اۋىر بولعاندىقتان دارىگەرلەر ايەلدى جۇكتىلىكتىڭ 30-شى اپتاسىندا وپەراتسيا جاساپ، بوساندىرىپ العان. 1 ۇل مەن 3 قىز دۇنيەگە كەلدى. 25 جاستاعى كەلىنشەك وسىلايشا بىردەن كوپبالالى انا اتاندى. سابيلەر - وتباسىنىڭ تۇڭعىشتارى.
«قۋانىشىمدى جاسىرا الماي تۇرمىن. اتا-انامىزدىڭ توبەسى كوككە جەتكەندەي بولدى. بالالارىمنىڭ امان-ەسەن جارىق دۇنيەگە كەلۋىنە سەبەپشى بولعان دارىگەرلەرگە وتباسىمنىڭ اتىنان العىسىمدى بىلدىرەمىن»، - دەدى ساميرا گاسانوۆا.
تورتەمدەردىڭ ءبىرى 1 كەلى 390 گر بولسا، ەڭ كىشىسىنىڭ سالماعى 1 كەلى 190گر سالماقتا تۋىلدى. شاقالاقتار كۇش جيناعانشا 36 كۇن بويى پەريناتالدىق ورتالىق دارىگەرلەرىنىڭ ءجىتى باقىلاۋىندا بولدى. اناسىنىڭ دا، بالالارىنىڭ دا دەنساۋلىعى جاقسى، دەيدى دارىگەرلەر. اتا-اناسى نارەستەلەرگە راسۋل، فانارا، ايلا مەن نارين ەسىمدەرىن بەرگەن.
«بىلتىر ءبىزدىڭ ورتالىقتا 8610 بالا جارىق دۇنيە ەسىگىن اشتى. ونىڭ ىشىندە 2 ۇشەم مەن 147 ەگىز بالا دۇنيەگە كەلگەن»، - دەدى ماڭعىستاۋ وبلىستىق انا پەريناتالدىق ورتالىعىنىڭ دارىگەر نەانوتولوگى تويدىق جۇماعامبەتوۆا.
ماڭعىستاۋ وبلىسى بالا تۋ كورسەتكىشىنەن رەسپۋبليكا بويىنشا سوڭعى 3 جىل بويى كوش باسىندا كەلەدى. بىلتىر ايماقتا 21753 ءسابي دۇنيەگە كەلگەن.
«ادىرنا» ۇلتتىق پورتالى
