اقش مەملەكەتتىك حاتشىسى مايك پومپەو قىتايدى شىڭجاڭ ايماعىندا ۇيعىرلار مەن وزگە دە مۇسىلمان توپتارعا “گەنوتسيد" جاسادى دەپ ايىپتادى دەپ حابارلايدى «ادىرنا» ۇلتتىق پورتالى ازاتتىققا سىلتەمە جاساپ.
پومپەو مالىمدەمەسىندە ميلليوننان استام بەيبىت تۇرعىننىڭ بوستاندىعىن شەكتەۋ، قاماۋ، كۇشتەپ ستەريليزاتسيا جاساۋ، ازاپتاۋ، جۇمىسقا جەگۋ، ءدىني كوزقاراسى مەن پىكىر ايتۋ قۇقىعىن شەكتەۋ سياقتى "ادامزاتقا قارسى قىلمىستار" تۋرالى جازىلعان.
“گەنوتسيد ءالى جالعاسىپ جاتىر دەپ سانايمىن جانە قىتاي كوممۋنيستىك پارتياسىنىڭ تىكەلەي باقىلاۋىمەن ۇيعىرلاردى جويۋعا جۇيەلى تۇردە تالپىنىستار جاسالىپ جاتقانىنا كۋا بولىپ وتىرمىز” دەدى پومپەو 19 قاڭتاردا.
پەكين قىتايدىڭ شىڭجاڭداعى ساياساتىن سىناپ جۇرگەن حالىقارالىق قاۋىمداستىق سىنىنا اشۋلى رەاكتسيا تانىتىپ، ايىپتاۋلاردى تەرىستەپ كەلەدى.
پومپەو بارلىق حالىقارالىق ۇيىمدار مەن سوتتاردى قىتايدىڭ مۇسىلمانداردى قۋدالاۋىنا شارا قولدانۋعا شاقىرىپ، ۆاشينگتون پەكينگە بۇدان بىلاي دا قىسىم جاساي بەرەدى دەپ سەنىم بىلدىرگەن.
دجو بايدەن مەملەكەتتىك حاتشى رەتىندە تاعايىندايدى دەگەن ەنتوني بلينكەن 19 قاڭتار كۇنگى سەنات تالقىلاۋىندا قىتايدىڭ مۇسىلمان توپتاردى قۋدالاۋىن "گەنوتسيد" دەپ باعالاۋمەن كەلىسەتىنىن ايتتى. بايدەن كامپانياسى وسىعان دەيىن دە ۇيعىرلاردى قۋدالاۋدى "گەنوتسيد" رەتىندە سيپاتتاعان.
بۇۇ قىتايدىڭ شىڭجاڭدا ميلليونعا جۋىق ەتنيكالىق ۇيعىر، قازاق جانە باسقا دا مۇسىلمانداردى "ەكسترەميزممەن كۇرەس ورتالىقتارىنا" قاماعانىن مالىمدەگەن. باستاپقىدا مۇنداي اقپاراتتى تەرىستەگەن پەكين كەيىن ونى "ەكسترەميزمگە قارسى شارا" دەپ تۇسىندىرگەن جانە ساياسي لاگەرلەردى "تىل ۇيرەنىپ، كاسىپكە باۋليتىن" ورتالىقتار دەپ اتاعان. قۇقىق قورعاۋشىلار مەن لاگەردە تۇتقىندا بولعان ادامدار ورتالىقتاردا قىسىم مەن ازاپتاۋ بارىن ايتقان.
قۇقىق قورعاۋشىلار سونىمەن بىرگە جۇزدەگەن مىڭ ادامنىڭ "ەڭبەك لاگەرلەرىنە" جابىلعانىنا الاڭداعان. اقش بىلتىردان بەرى قىتايدىڭ تايۆان، تيبەت، گونكونگ، وڭتۇستىك شىعىس تەڭىزىندەگى ارەكەتىنە بايلانىستى پەكينگە قىسىمىن ۇدەتىپ، شەنەۋنىكتەرىنە سانكتسيا سالۋمەن كەلەدى.
