جەمقورلىقپەن كۇرەس قورى "پۋتين سارايى" دەگەن اتپەن بەلگىلى گەلەندجيك تۇبىندەگى ءزاۋلىم ساراي جايلى زەرتتەۋ جاريالادى دەپ حابارلايدى «ادىرنا» ۇلتتىق پورتالى ازاتتىققا سىلتەمە جاساپ.
حيمكي سوتى گەرمانيادان رەسەيگە ورالعان قور جەتەكشىسى الەكسەي ناۆالنىيدى 30 تاۋلىككە قاماعان. زەرتتەۋ ناۆالنىي ۇستالعانعا دەيىن جاسالعان. دەرەكتى فيلم جانرىندا تۇسىرىلگەن 2 ساعاتقا سوزىلاتىن ۆيدەودا فيلم اۆتورلارىنىڭ ءبىرى ءارى جۇرگىزۋشىسى رەتىندە ناۆالنىيدىڭ ءوزى دە كورىنەدى.
"پۋتين سارايى" دەگەن اتپەن بەلگىلى رەزيدەنتسيا 2005-2010 جىلدارى قارا تەڭىز جاعالاۋىندا گەلەندجيككە جاقىن ماڭعا تۇرعىزىلعان. سارايدىڭ رەسەي پرەزيدەنتى ۆلاديمير پۋتينگە ارنالعانىن 2010 جىلى كاسىپكەر سەرگەي كولەسنيكوۆ مالىمدەگەن. ول جوبا قۇنىن 1 ملرد دوللارعا باعالاعان. سودان بەرى ساراي تۋرالى بىرقاتار باق جازعان، ازاتتىقتىڭ ورىس قىزمەتى دە ماقالا جاريالاعان.
جەمقورلىقپەن كۇرەس قورى زەرتتەۋىندە ساراي قۇرىلىسىن قارجىلاندىرۋ سحەماسىنا كوڭىل بولگەن. سونىمەن بىرگە ساراي ينتەرەرىن دە ءسوز ەتكەن.
"بۇل رەسەيدە ەڭ قاتاڭ كۇزەتىلەتىن ورىن، ءىس جۇزىندە "مەملەكەت ىشىندەگى مەملەكەت" دەۋگە كەلەدى. بۇل جۇزدەگەن، ءتىپتى مىڭداعان ادام - ەشكىم بىلمەيتىن كۇزەتشى، باعبان، قۇرىلىسشىدان باستاپ رەسەيدەگى ەڭ باي، تانىمال ادامداردى قامتيتىن ەڭ ۇلكەن پۋتيندىك قۇپيا" دەلىنگەن زەرتتەۋ كىرىسپەسىندە. ساراي قۇرىلىسىنا بولىنگەن قارجىنى فيلم اۆتورلارى "تاريحتاعى ەڭ ءىرى پارا" دەپ اتاعان.
وننان استام ساعات ىشىندە زەرتتەۋدى 15,3 ملن ادام كورىپ ۇلگەرگەن.
زەرتتەۋ ساياسي ۇراندارمەن - اتاپ ايتقاندا، ۆلاديمير پۋتين بيلىگىمەن كۇرەسۋ، سايلاۋدا "ەدينايا روسسياعا" قارسى داۋىس بەرۋ ءتارىزدى ۇندەۋلەرمەن اياقتالادى.
ۆلاديمير ءپۋتيننىڭ ءباسپاسوز حاتشىسى دميتري پەسكوۆ"پودەم" باسىلىمىنا زەرتتەۋ جايلى تۇسىنىكتەمە بەرگەن.
"ابدەن جاۋىر بولعان پلاستينكا. كوپ جىل بۇرىن ءپۋتيننىڭ ەشقانداي سارايى جوق ەكەنىن ايتىپ تۇسىندىرگەنبىز" دەدى ول. كرەمل وسىعان دەيىن دە ءپۋتيننىڭ گەلەندجيكتەگى سارايعا قاتىسى جوق ەكەنىن مالىمدەگەن.
