“وتباسىلىق زورلىق-زومبىلىققا قارسى” زاڭ جوباسى تالقىلانۋ ۇستىندە. اۋەلگى وقىلىمى ماقۇلدانىپ تا ۇلگەرگەن. كاسىبي زاڭگەرلەردىڭ ءجىتى ءتۇسىندىرۋىنىڭ ارقاسىندا، زاڭ جوباسىنىڭ ءون بويىنداعى قانشاما جاسىرىنعان جاۋلىق پيعىلداردى بايقاپ جاتىرمىز.
يا، قوعامدا زورلىققا ۇشىراعان ايەل، قورلىققا ۇشىراعان بالا جوق ەمەس. ونى ءبىز دە ايىپتايمىز. ايىپتاماق تۇگىلى، سەبەبىمەن كۇرەسىپ، قوعامدى مەيىرىمگە شاقىرۋدان شارشاعان ەمەسپىز.
بىراق، ونداي جاعداي قاي ەلدە جوق. قازىر قازاق قانا ەمەس، ادامزات ازعىندىقتىڭ قۇربانىنا اينالۋدا. تەحنولوگيانىڭ ارتىنا جاسىرىنىپ تەكسىزدىك كەلدى، اقپاراتتىڭ ارتىنا تىعىلىپ بەتسىزدىك كەلدى. بۇرىن اتا-اجەلەرىمىز: “ىسقىرما، شايتان شاقىراسىڭ”، دەپ، نەمەسە مالعا شاباتىن جىرتقىشتىڭ دا اتىن اتاماي “يت-قۇس” دەپ تۇسپالداپ سويلەۋگە ۇيرەتەتىن.
ال، قازىر “يت-قۇس” دەپ استارلاماق تۇگىلى بۇكىل ارسىزدىقتى الاقانعا اشىق-شاشىق اكەلىپ قويدىق. تۇيمەسىن باس تا كورە بەر...
الەمنىڭ قوجايىندارى الىمجەتتىك جاساپ جاتىر. بالاعا ۇياتتى ۇيرەتەيىك دەسەڭ، “جوق، جىنىستىق ساۋاتتىلىقتى ۇيرەتەيىك” دەيدى...
ەركەكتى ءادىل اسىراۋشى، ارقا سۇيەر تۇلعا عىپ تاربيەلەيىك دەسەڭ، “جوق، ايەل ءوز كۇنىن ءوزى كورسىن، ەركەكتەن ەش كەمدىگى جوق” دەيدى...
ەندى كەپ، ەل ىشىندە كەيبىر كەلەڭسىزدىكتەردى العا تارتىپ، سولاردىڭ بوداۋىنا بۇكىل ۇلتتىڭ مىڭ جىلدىق قارىم-قاتىناس قاسيەتتەرىن، ءداستۇرلى، وتباسىلىق بايلانىس مودەلدەرىن قۇرباندىققا شالماقشى...
قازاق: “بالاڭدى اياساڭ اياما” دەيدى. ول دەگەن ۇر، سوق، قورلا دەگەن ءسوز ەمەس. ۇل-قىزدارىمىزدى ۇرمايىق، سوقپايىق، ايالاپ، ارداقتاپ وسىرەيىك. بىراق ونىڭ تاعدىرىن، قالاۋىن باتىستىڭ ستاندارتىنا بايلاپ بەرمەيىكشى. ءوز ۇرپاعىمىزدى ءوزىمىز زامانعا ساي، بابالار مەنتاليتەتىن مانسۇقتاماي-اق تاربيەلەيىكشى...
ونسىز دا ءبىر حالىق ءۇش تىلدە سويلەپ، ساپامىز كەتىپ، ساقامىز ءمۇجىلىپ تۇرعاندا، ۇلىعىڭ ۇرى، زيالىڭ زالىم، شارۋاڭ شالكەس بوپ تۇرعان زاماندا، ەندى كەپ، ارەڭ دەگەندە اۋپىرىممەن تۇرعان وتباسىنداعى قارىم-قاتىناسىمىز ويراندالماسىنشى.
زورلىقشىلداردىڭ وزىمەن كۇرەسەيىك، ەشتەڭە ويىندا جوق ەسسىز بالالاردىڭ ەموتسياسىن اتا-اناسىنا قارسى قويمايىقشى.
جامبىل دا جاپادان ءسوز ەستىگەن، اباي دا قۇنانبايدىڭ قاباعىنان سەسكەنگەن. ءبىر سۇمدى جازالايمىز دەپ، ون ۇلدى بۇزىپ المايىقشى...
“جات جارىلقامايدى، ءوز ولتىرمەيدى” دەپ بەكەر ايتىلعان جوق قوي.
سوندىقتان اعايىن، ەل بولىپ ەستيار ءسوز ايتىپ، سايلاۋشىلار اتىنان زاڭدى تۇردە تالاپ ەتپەسەك، تاعى دا ءبىر ۇلكەن وپىق جەۋىمىز مۇمكىن.
انت بەرگەن كەزدە ەكى اۋىز ءسوزدىڭ ءوزىن پارىقتاي الماي تۇرعان دەپۋتاتتار، بۇل زاڭنىڭ اق-قاراسىن اجىراتپاي وتكىزىپ جىبەرۋى دە ابدەن مۇمكىن...
كارى قۇرلىق ەۋروپا دا ەرتەدە وتباسىلىق قۇندىلىقتاردى ارداقتاپ، بەس-التىدان بالا تاۋىپ، ءوزارا مەيىرىم-ماحابباتتا عۇمىر كەشكەن.
كەيىننەن ءناپسى قالاۋىن العا شىعارعاندار مەن ەگويستتىك ماقساتى باسىم تۇسكەندەر ءار ءتۇرلى سىلتاۋعا سىنىق ىزدەپ، ادامزات جاراتىلىسىنا قارسى زاڭداردى ويلاپ شىعاردى.
سونىڭ ارقاسىندا دەموگرافيا كۇرت ءتۇسىپ، اتا-انا مەن بالا-شاعا ءبىر شاڭىراقتىڭ استىندا شۇيىركەلەسىپ ءومىر سۇرە المايتىن جاعدايعا جەتتى.
سودان باستاۋ العان قۇبىلىستار قۇبىجىقتانىپ، ەركەكپەن ەركەك، قىز بەن ايەل كوڭىل قوساتىن حالگە جەتتى...
ونسىز دا ۇلدارىمىزدان نامىس كەتىپ، قىزدارىمىزدان ۇيات جوعالىپ بارا جاتقاندا، مىنا زاڭ قابىلدانسا، قاتال قاتىگەزگە، تۋىس تاس جۇرەككە، كورشى ارىز جازعىش الا نيەتكە اينالۋى مۇمكىن...
اللادان اعايىنعا ىنتىماق-بەرەكە، دەپۋتاتتارعا دەگدار شەشىمدەر، اتقارۋشى بيلىككە ىنساپ پەن ادىلدىك تىلەيمىن.
ء“ماسىنىڭ قونىشىنداي تار زاماندا، كەبەجەدەي كوڭىلىن كەڭ ساقتاعان” قازاق بوپ قالايىقشى، اعايىن!
جازبا اۆتوردىڭ Facebook-تاعى پاراقشاسىنان الىندى.
