سۋ جاڭا پارلامەنت دەپۋتاتتارى بالالاردىڭ قۇقىعىن قورعاۋعا قاتىستى جاڭا زاڭدى قاراماق. «وتباسىنداعى زورلىق-زومبىلىقتى بولدىرماۋ» شارالارىنا قاتىستى بۇل زاڭ قاراپايىم ادامداردان بولەك ونەر ادامدارىن دا جاعا ۇستاتۋدا. ءوزىنىڭ ينستاگرام الەۋمەتتىك جەلىسىندە ءانشى، پروديۋسەر قىدىرالى بولمانوۆ وسى زاڭعا بايلانىستى قارسىلىعىن ءبىلدىرىپ، پىكىر جازدى دەپ حابارلايدى «ادىرنا» ۇلتتىق پورتالى.
تومەندە ق.بولمانوۆتىڭ جازباسىن وزگەرتۋسىز نازارلارىڭىزعا ۇسىنىپ وتىرمىز. «بالانى اتا-اناسىنان قورعاۋ زاڭى ؟ وسىنداي زاڭ قابىلدانادى دەيدى. اللا ساقتاسىن ! وسىنداي ءسوز بولادى ما زاڭ تۇگىلى ؟ پارلامەنتتىڭ سۋ جاڭا دەپۋتاتتارى العاشقى تالقىلايتىنى ەكەن بۇل.
“وسى جولى سايدىڭ تاسىنداي ىرىكتەلىپ كىل جاقسىلار باس قوستى عوي، سايلانسا يگى بولار ەدى” دەپ كۇتىپ ەدىك، ناتيجەنى اۋەلدەن ءىشىمىز سەزسە دە. ودان كەيىن
“سۇرىپتالىپ” سايلانعانداردىڭ بەرگەن انتىن كوردىك.كوزدەن ۇيات بولدى. “قازاق القىنا ادال بولۋعا انت بەرەمىن” دەگەن ءسوزدى قيىپ تۇسەر قىلىشتاي وتكىر ەتىپ ايتا الماعان سوڭ... مىنا زاڭدى قاي جاعىنا شىعارماق؟!
⠀نە دەيدى؟!
سىرتتاي ءبىر ادام “مىنا بالاعا قاۋىپ ءتونىپ تۇرعان سياقتى” دەپ قۇزىرەتتى ورگانعا حابارلاسا ءاي-ءشاي جوق كەپ بالانى جۇلىپ الىپ كەتەدى ەكەن.
⠀ۇرىسساق - ەموتسيونالدى، ۇرساق - فيزيكالىق، سۇراعانىن الىپ بەرمەسەڭ - ەكونوميكالىق قىسىم كورسەتكەن بولىپ اتا-انا جاۋاپقا تارتىلىپ، بالانى تاعى الىپ كەتەدى ەكەن. اتا-اناسى پسيحيكالىق جوندەۋدەن وتپەيىنشە بالانى كورە المايدى، جاعدايىن بىلە المايدى. جوندەلۋ ءۇشىن بەلگىلەنگەن وڭشەڭ پسيحوتروپتىق ءدارىنى ەش قارسىلاسپاي ءىشىپ سالىپ وتىرۋعا ءماجبۇر.
مىنە، اڭگىمە قايدا جاتىر؟! ال وعان دەيىن بالا ارنايى ورتالىقتاردا جاتادى دەي مە، ۋاقىتشا ءبىر وتباسىعا بەرىلەدى دەي مە، ول جاعىن ءتىپتى اقىلىم المادى. ماسقارا! قورقىنىشتى!
⠀
كورشىڭ “مىنانىڭ بالاسى كۇندەگىدەن كوبىرەك جىلادى” دەپ شاعىمدانسا، جەتىپ كەلىپ بالانىڭ دەنەسىن باستان-اياق قارايدى ەكەن دە، ينەنىڭ ۇشىنداي كوگەرگەن، قىزارعان بەلگى تاپسا ءبىتتى بالانى ارقالاپ كەتە بارادى ەكەن. بالا جۇگىرمەي مە، سەكىرمەي مە، قۇلاماي ما؟! ء“اي ويباي ويناما، جۇرمە، وتىر، كوگەرتەرسىڭ” دەپ قادام باستىرماي بايلاپ وتىرايىق؟!
⠀
باسقانى قويشى، بالا ءوزى دە قوڭىراۋ شالىپ ارىز بەرە الادى ەكەن. اللا-اۋ، تەلەفوندى تۋعاننان ءبىلىپ شىعاتىن بۇلارىڭ، قيت ەتسە زۆونداپ تۇرسىن وندا؟! نەعىلماقشى ؟!
⠀
ۇلىڭ ۇيلەنەم دەپ ءبىر ۇلدى جەتەكتەپ كەلسە دە قارسى بولمايسىڭ. ايتپەسە بارار جەرىڭ تەمىر توردىڭ ارعى جاعى. استاپىراللا!
⠀
مىنا زامان قالاي-قالاي تۇرلەنەدى؟!
قايدا بارا جاتىرمىز؟ كىمگە سەنەمىز؟
مۇددەلەرى نە؟ ۇرپاعىمىز ارقىلى بولاشاققا بالتا شاۋىپ، ۇلتتى ماڭگۇرتتەندىرىپ، ەلدى ەسسىزدەندىرۋ مە؟!
⠀
قارسىمىن!
⠀
قازىر وزىمە، مەنىڭ جەكە باسىم مەن وتباسىما قارسى قيسىق- قىڭىر سوزدەردى قارشا بوراتاتىن جاندايشاپتار شابۋىلعا شىعاتىنان جاقسى بىلەم. بىراق تا، وسى كەزدە بىرىگەتىن ۋاقىت كەلگەن جوق پا؟»
