«ادىرنا» ۇلتتىق پورتالىنىڭ كەزەكتى سۇحباتى قول كۇرەستەن ازيا چەمپيونى، مۇگەدەكتەر اراسىندا سۋدەن جۇزۋدەن قازاقستان چەمپيونى، قايسار جان ازامات نۇراليەۆپەن بولدى.
– ازامات مىرزا، الدىمەن ءوزىڭىز جايلى ايتىپ كەتسەڭىز. قاي ءوڭىردىڭ تۋماسىسىز؟ قازىرگى تاڭدا نەمەن اينالىساسىز؟
— اسسالاۋماعالەيكۋم! ەسىمىم – ازامات. وتىز ەكى جاستامىن. دۇنيە ەسىگىن وزبەكستاندا اشتىم-ۇلتىم – قازاق. قازىرگى تاڭدا الماتى وبلىسى قارعالى اۋىلىندا تۇرامىن. جىلجىمايتىن مۇلىك اگەنتتىگىندە جۇمىس جاسايمىن.
– قايعىلى وقيعاعا تاپ بولىپ، دەنە مۇشەڭىزگە زاقىم كەلگەن بولاتىن. سول تۋرالى بايانداپ بەرە الاسىز با؟
– وقيعا 2014 جىلدىڭ ون ءۇشىنشىسى قاراشاسىندا بولدى. جۇمىستا وتتەگى باللونى جارىلىپ، ەكى اياق، سول قولدان ايرىلىپ قالدىم. جەدەل جاردەممەن قاسكەلەڭ قالاسىنداعى اۋرۋحاناعا جەتكىزىلىپ، ءۇش اي ەم الدىم.
– وسى ءبىر جاعداي ومىرىڭىزگە قالاي اسەر ەتتى؟
– وتە قاتتى اسەر ەتتى. اياقسىز جاتقانىمدى كورىپ، قايتا-قايتا شوكقا ءتۇسىپ قالا بەرىپپىن. ءوز-وزىمە «نەگە ءتىرى قالدىم؟ ەندى كىمگە كەرەكپىن؟ ارى قاراي نە بولادى؟» دەگەن سىندى سۇراقتاردى قوياتىنمىن.ول كۇندى ەشكىمنىڭ باسىنا بەرمەسىن...
– سول ساتتە سىزگە كىم ارقاۋ بولدى؟
– بىرىنشىدەن، بۇل — اللا تاعالامنىڭ ماعان بەرگەن ەكىنشى مۇمكىندىگى. سونداي-اق، اتا-انام،جان جارىم،بالا-شاعام، تۋعان-تۋىستارىم مەن جاقىندارىم، دوستارىم ارقاۋ بولدى.
– ال سپورتقا دەگەن قىزىعۋشىلىعىڭىز قالاي وياندى؟ باستاپقى كەزدە قانداي قيىنشىلىقتار بولدى؟
— سترەسس، دەپرەسسيا دەگەن جەتىپ جاتتى عوي. كوشەگە شىققاندا جالعىز مەنىڭ عانا مۇمكىندىگىم شەكتەۋلى دەپ ويلايتىنمىن. قوعام ماعان ايانىشپەن قارايتىنداي كورىندى. سول سەبەپتى جۇرت كوزىنە كورىنگىم كەلمەيتىن. 2014 جىلدان 2017 جىلعا دەيىن، ياعني 3 جىل سترەستە بولدىم. ءبىر كۇنى ۇلكەن ۇلىمنىڭ سپورت جارىسى بولاتىن بولدى. كەلىنشەگىم قويماي «ءجۇر دە ءجۇر، بىرگە تاماشالايمىز» دەگەن سوڭ قولداۋعا باردىم. سول جەردە كوپ جاتتىقتىرۋشىلاردى كوردىم. اراسىندا مۇگەدەك جانداردى سپورتقا جەتەلەيتىن ترەنەر اعامىز «سپورتقا كەل» دەپ ۇسىنىس جاسادى. بىردەن «مەنەن قانداي سپورتشى شىعادى؟» دەگەن ويعا كەلدىم. ءارى-بەرى ءجۇرىپ، ويلانىپ كورەيىن دەپ شەشتىم. وسى ۋاقىت ارالاعىندا ءارتۇرلى سپورتپەن شۇعىلدانىپ كوردىم. ەڭ ىڭعايلىسى جانە ۇناعانى سۋدا ءجۇزۋ بولدى. سپورتتىڭ ارقاسىندا جاتتىعۋ زالىندا بۇكىل سترەسستەن ارىلدىم دەسەم دە بولادى. ەڭ باستىسى، ايتىسكەر اقىن، قازىرگى تاڭداعى ءنومىرى ءبىرىنشى كوۋچ-موتيۆاتور اينۇر تۇرسىنباەۆانىڭ ساباقتارىنا قاتىسىپ ، ومىرگە دەگەن كوزقاراسىم وزگەردى.
– العاشقى جەتىستىگىڭىز تۋرالى ايتىپ بەرسەڭىز؟
– ەڭ العاش الماتى وبلىسى تالعار قالاسىندا وتكەن جارىستان 1 ورىن الۋ بۇيىردى. شىنى كەرەك، وزىمە 100 پايىز سەنىمدى بولدىم. قولداۋشىلارىم سەنىم ارتىپ تۇرعاندا بويىمدا ەش قورقىنىش بولمايدى ەكەن.
– سپورتتان باسقا قانداي حوببيىڭىز بار؟
– سپورتتان بولەك Instagram پاراقشامدا ادامدارعا «شابىت بەرسەم» دەگەن نيەتپەن ءارتۇرلى بەينەروليكتەر ءتۇسىرىپ ءجۇرمىن.
– ءسىزدى نە شابىتتاندىرادى؟
– اللا بەرگەن ۇل-قىزدارىمنىڭ اكەسىنە دەگەن ماحابباتتارى شابىتتاندىرادى.
– سۇحباتىڭىزعا راقمەت!
اڭگىمەلەسكەن ديانا اسان،
«ادىرنا» ۇلتتىق پورتالى
