قازاق – دانا حالىق. ۇلى دالامىزدا ۇرماي-سوقپاي، بالاعاتتاماي ەسە قايتارۋدىڭ نەمەسە ماسقارالاۋدىڭ نەبىر جولى بولعان. سونىڭ ءبىرى–«بەتكە تۇكىرۋ». بابا قاعيداتتارىنا جەتىك جاندار مۇنى جاقسى بىلەدى. جابىرلەنگەن، ءالى كەلمەگەندىكتەن امالى قۇرىپ، زىعىردانى قايناعان ادامدار وزىنە ءزابىر كورسەتكەن، الىمجەتتىك جاساعان ادامنىڭ بەتىنە تۇكىرىپ، ەسە قايتارادى. ادامدى قورلاۋدىڭ سوراقى ءتۇرى سانالاتىن مۇنداي ارەكەت جۇرت كوزىنشە جاسالسا، ول ازعىنداردى اۋىر پسيحولوگيالىق زارداپقا سوقتىرۋى دا مۇمكىن. تولەگەندى تۋ سىرتىنان وققا بايلاعان بەكەجاننىڭ بەتىنە تۇكىرگەن ءساتتى «قىز جىبەك» كينوسىنان كورگەن بولارسىزدار...
قازىر 21 عاسىر. باياعى زاماننىڭ جازالاۋ فورمالارى كەلمەسكە كەتتى. بىرەۋدىڭ بەتىنە تۇكىرمەك تۇگىلى، ۆيدەوعا زاڭسىز ءتۇسىرىپ، جەلىدە تاراتساڭىز، ءوزىڭىز ءىستى بولاسىز. دەسە دە، پارا العانى ءۇشىن زاڭدى تۇردە جازاسىن السا دا جامان ادەتتەن تيىلا الماي جۇرگەندەر قانشاما. جەمقورلاردى جازالاۋ ادىستەرىن قاتاڭداتىپ، تۇرلەندىرسەك تە ناتيجە جوق. قىتايداعىداي ءولىم جازاسىن ەنگىزۋگە، قولىن شاۋىپ مۇگەدەك قىلۋعا ۇكىمەتتىڭ ءداتى بارمايدى.
كوررۋپتسياعا قارسى كۇرەس تۋرالى ارنايى زاڭ قابىلداپ، تەرگەۋ ورگاندارىنىڭ ءتۇر-ءتۇرىن قۇرساق تا كوسەگەمىز كوگەرمەي جاتىر. جەمقورلىق تاۋەكەلىنە شالدىقپاسىن دەپ شەنەۋنىكتەردىڭ جالاقىسىن ەسەلەپ كوتەرسەك تە قوعامدى دەندەگەن دەرتتەن ارىلتا المادىق.
قايتپەك كەرەك؟
جاۋاپ بىرەۋ. ول اتا-بابامىزدىڭ ءتيىمدى ادىستەرىنىڭ كەيبىر ەلەمەنتتەرىن قولدانىسقا ەنگىزۋ. ادام بەتىنە تۇكىرە الماساق تا «قارابەت» ۇعىمىن زاڭدى تۇردە بەكىتىپ، جازا تۇرلەرىن سوعان سايكەس قاراستىرۋعا ابدەن بولادى. مۇندا ەڭ ماڭىزدىسى – جازا ءتۇرى. ول ازعىنداعان ادامدى بەلگىلى ءبىر مەرزىمدە مەملەكەتتىڭ دە، قوعامنىڭ دا نازارىنان تىس قالدىرۋى كەرەك. قىسقاسى، ەشكىمنىڭ بەتىنە قاراي المايتىنداي ەتۋ قاجەت. مىسالى، «قارابەت» اتانعان ادام حالىققا قىزمەت كورسەتۋ ورتالىقتارىندا وزىنە قاتىستى قىزمەت الا الماۋى ءتيىس. مۇلكىن ساتا الماي، زاڭدى كاسىپ اشا الماي، ءتىپتى مەرزىمى بىتكەن كۋالىگىن جاڭارتا الماي جاتۋى كەرەك. قارابەتتەرگە تىپتەن، كولىكتىڭ بارلىق تۇرلەرىنە جولاۋشى بيلەتىن ساتۋعا تىيىم سالعان ءجون.
بۇل جازا قىلمىستىق جازاعا قوسىلىپ بەرىلگەنى جاقسى. ماسەلەن، جەمقور 7 جىل اباقتىعا جابىلسا، تاعى 7 جىل اكىمشىلىك شارا رەتىندە ونى «قارابەت» قىلۋ كەرەك. «بۇل ادامنىڭ قۇقىعىن تاپتاۋ» دەيتىندەر مىندەتتى تۇردە تابىلادى. مۇندايدا ايتاتىنىم – كوررۋپتسياسى جوقتىڭ قاسى جاپونياعا بارىڭىز. ول جەردە كاندزي ۇعىمىنداعى ءوز «قارابەتتەرى» بار.
قانداي رەفورما جاساساق تا، جەمقورلىق جويىلماي ەل دامىمايدى. وسىنى ەستەن شىعارمايىق، اعايىن!
اۋىل پارتياسى جەمقورلىققا قارسى!
ماقالاعا قاراجات «اۋىل» حالىقتىق-دەموكراتيالىق
پاترويتتىق پارتياسىنىڭ
سايلاۋ قورىنىڭ قاراجاتىنان تولەندى
